Украіна дэпартуе 31-гадовага беларуса праз гуманітарны калідор на мяжы з Брэсцкай вобласцю

16 жніўня, Позірк. Аб прымусовай дэпартацыі 31-гадовага грамадзяніна Беларусі паведаміла Дзяржаўная міграцыйная служба Украіны.

Рашэнне аб гэтым было прынята 15 жніўня.

“Праваахоўнікі выявілі замежніка ў адным з населеных пунктаў у горнай мясцовасці [Івана-Франкоўскай вобласці]. Дакументальна пацверджана, што малады чалавек страціў якія-небудзь законныя падставы для далейшага знаходжання ва Украіне”, — гаворыцца ў паведамленні ведамства.

Адзначаецца, што беларус дастаўлены ў Валынскі цэнтр часовага пражывання замежнікаў і асоб без грамадзянства, якія незаконна знаходзяцца ва Украіне.

“У далейшым будуць прынятыя меры па прымусовым выправаджэнні беларуса праз гуманітарны калідор на дзяржаўнай мяжы з Беларуссю”, — заявілі ў міграцыйнай службе.

Падкрэсліваецца, што ва Украіне дзейнічае “прававы рэжым ваеннага становішча”, у сувязі з чым прымаюцца “ўзмоцненыя і строгія прэвентыўныя меры” для забеспячэння нацыянальнай бяспекі і грамадскага парадку.

Афіцыйна Украіна закрыла мяжу з Беларуссю пасля пачатку вайны, развязанай Расіяй пры падтрымцы Мінска.

Разам з тым, паводле звестак Дзяржаўнага памежнага камітэта на 9 жніўня, з пачатку года ў Беларусь непасрэдна з тэрыторыі Украіны ўехала 35 украінскіх грамадзян, а з 24 лютага 2022 года — 15.953.

21 ліпеня 2022 года ў інтэрв’ю французскаму інфармацыйнаму агенцтву “Франс Прэс” Аляксандр Лукашэнка паведаміў, што з Беларусі ва Украіну была ўведзеная 20-тысячная групоўка расійскіх войскаў. Пасля паўночныя тэрыторыі былі вызваленыя Узброенымі сіламі Украіны.