У беларускай эканоміцы няма перагрэву — гэта “нармальны цеплавы баланс”, сцвярджае намеснік міністра Картун
16 жніўня, Позірк. Дынаміка знешняга гандлю “некалькі адстае” ад прагнозных паказчыкаў з-за шэрагу “ключавых фактараў, якія аказваюць негатыўны ўплыў”, заявіў у інтэрв’ю газеце “Рэспубліка” першы намеснік міністра эканомікі Андрэй Картун.
Паводле слоў чыноўніка, на знешні гандаль Беларусі негатыўна ўплывае “сур’ёзны рост кошту расійскай нафты”.
“З 2024-га завершаны “падатковы манеўр” у Расіі, і нафту мы імпартуем па сусветных цэнах. Акрамя таго, спрэд паміж коштам эталоннага гатунку Brent і Urals скараціўся да мінімуму”, — адзначыў намеснік міністра.
Другі фактар, сказаў Картун, — кошты калійных угнаенняў, якія “значна знізіліся ў 2023–2024 гадах у параўнанні з 2022-м”.
“Цяпер рынак застыў. У ключавых сусветных пастаўшчыкоў праходзяць перамовы з дзяржавамі — асноўнымі спажыўцамі гэтай прадукцыі. Гэты няпросты працэс адбываецца амаль кожны год, і да яго неабходна ставіцца спакойна: так уладкаваны калійны рынак”, — удакладніў намеснік кіраўніка ведамства.
Ён паведаміў, што “не цалкам аднавіліся каціроўкі на некаторыя іншыя значныя экспартныя пазіцыі Беларусі”, не ўдакладніўшы, пра якія пазіцыі ідзе гаворка.
Пры гэтым Картун адхіліў “праблему перагрэву эканомікі Беларусі, якая актыўна абмяркоўваецца ў інфармацыйнай прасторы”. На яго думку, эканоміка “на сённяшні дзень захоўвае нармальны цеплавы баланс”, пра што “сведчаць макраэканамічныя паказчыкі і іх збалансаванасць”.
Прадстаўнік Мінэканомікі не выключыў, што “па выніках пяцігодкі не атрымаецца дасягнуць прагнозу па нейкіх індыкатыўных паказчыках, у тым ліку ў сілу знешніх шокаў”.
“З 2020 года рэалізаваліся рызыкі, пра якія нават ніхто не задумваўся. Натуральна, яны аказалі значны ўплыў на нашу эканоміку”, — падкрэсліў чыноўнік.
7 жніўня прэм’ер-міністр Раман Галоўчанка заявіў, што “так званыя эксперты палохаюць перагрэвам эканомікі”. “З таго боку ўсе эканамічныя навіны падаюцца выключна ў негатыўным ключы, разлічваючы на людзей, якія не вельмі разбіраюцца ў эканамічных мадэлях”, — заявіў кіраўнік урада.
Ён лічыць, што эканамічныя рашэнні, якія прымаюцца, улічваюць усе рызыкі негатыўных наступстваў. “Я вас запэўніваю, што ў эканамічным блоку ўрада, нашай банкаўскай сістэме працуюць вельмі прафесійныя людзі, якія выдатна ўсё гэта ведаюць і разумеюць”, — сказаў Галоўчанка.
Заявы некаторых эканамістаў пра тое, што ў Беларусі шмат грошай, ён назваў сведчаннем разумення эканамічных працэсаў на “нізкім узроўні”.
На брыфінгу 7 жніўня старшы навуковы супрацоўнік даследчага цэнтра BEROC Анатоль Харытончык, адказваючы на заяву Галоўчанкі, падкрэсліў: “Перагрэў эканомікі “ўсё ж такі ёсць”, і яго маштаб “досыць значны”.
Паводле яго слоў, аб перагрэтасці эканомікі гаворыць не толькі незалежная эканамічная экспертная супольнасць. “Нацбанк у сваёй інфляцыйнай справаздачы паказаў, што ў іх таксама існуе разрыў выпуску прыкладна 3% ці нават крыху вышэй. Таму яны таксама ацэньваюць эканоміку сур’ёзна перагрэтай”, — падкрэсліў Харытончык.
Гл. таксама:
За сем месяцаў сума наяўных грошай у абароце вырасла на 15% — Нацбанк