СК завёў крымінальную справу на коміка Камісаранку

16 жніўня, Позірк. Аб пачатку спецыяльнай крымінальнай вытворчасці ў дачыненні да 39-гадовага коміка Вячаслава (Славы) Камісаранкі паведаміў 16 жніўня Следчы камітэт у спецыялізаваным тэлеграм-канале.

Камісаранка абвінавачваецца па ч. 1 арт.130 (распальванне расавай, нацыянальнай, рэлігійнай альбо іншай сацыяльнай варожасці або варажнечы), ч. 2 арт. 367 (паклёп у дачыненні да прэзідэнта), ч. 1 арт. 368 (абраза прэзідэнта) Крымінальнага кодэкса.

Спецвытворчасць распачатая 15 жніўня.

Камісаранку прапанавана з’явіцца ва ўпраўленне СК па Мінску.

Комік часта жартуе з Аляксандра Лукашэнкі і палітыкі, якую ён праводзіць.

У траўні Камісаранка паведаміў, што пасля выступу ў Турцыі прадстаўнік МУС гэтай краіны папрасіў перадаць коміку, што не варта жартаваць наконт вышэйшых службовых асоб гэтай краіны.

Спецыяльная вытворчасць — вытворчасць па крымінальнай справе ў дачыненні да абвінавачанага, які знаходзіцца па-за межамі Беларусі і ўхіляецца ад яўкі ў орган, які вядзе крымінальны працэс. Магчыма па 34 складах злачынстваў, якія пераважна ставяцца да катэгорыі цяжкіх і асабліва цяжкіх. Сярод іншага гэта акт тэрарызму, генацыд, найміцтва, Здрада дзяржаве, дыверсія, стварэнне экстрэмісцкага фарміравання альбо ўдзел у ім, масавыя беспарадкі, заклікі да санкцый і інш.

Першыя спецвытворчасці былі адкрыты 26 верасня 2022 года. Колькасць грамадзян, у дачыненні да якіх яно ўжыта Следчым камітэтам, дасягнула 116.