Дэмсілы Арменіі запатрабавалі ад уладаў разрыву дыпадносін з Беларуссю “да зрынаня дыктатара Лукашэнкі з пасады”(дапоўнена)

21 жніўня, Позірк. “Неадкладна разарваць дыпламатычныя адносіны з Беларуссю да зрынання дыктатара Лукашэнкі з пасады” запатрабавалі дэмакратычныя сілы Арменіі ад уладаў сваёй краіны.

З гэтым і іншымі палітычнымі патрабаваннямі іх прадстаўнікі выйшлі 21 жніўня да амбасады Беларусі ў вёсцы Арындж пад Ерэванам.

Патрабаванне разрыву дыпадносін згадваецца ў заяве Кансультатыўнай платформы дэмакратычных сіл Арменіі, тэкстам якой падзяліўся з “Позіркам” палітолаг, экспэрт армянскага цэнтра палітычных і міжнародных даследаванняў Рубен Меграбян, які з’яўляецца адным з арганізатараў акцыі.

Дэмсілы таксама рэкамендавалі запрасіць у Ерэван з візітам “абранага прэзідэнта Беларусі Святлану Ціханоўскую”.

Словы “беларускага дыктатара Лукашэнкі на адрас Арменіі і армянскага народа ў інтэрв’ю, дадзеным тэлеканалу “Расія” 19 жніўня, у якім ён заявіў, што “армяне нікому не патрэбныя” — чарговая праява яго антыармянскай пазіцыі, якая стала для яго благой традыцыяй”, адзначаецца ў заяве.

“Прымаючы пад увагу падтрымку, нададзеную Беларуссю Азербайджану ў вайне супраць Арменіі” і “прызнаючы сістэматычнае парушэнне правоў уласнага народа і грамадзян з боку беларускага дыктатарскага рэжыму”, Кансультатыўная платформа дэмсіл Арменіі запатрабавала ад уладаў абвясціць амбасадара Беларусі і ўвесь астатні дыпперсанал персонамі нон грата і даць ім трое сутак на тое, каб пакінуць тэрыторыю краіны.

Таксама прапануецца “разарваць усе двухбаковыя дамовы з Беларуссю, уключаючы пагадненне аб бязвізавых паездках грамадзян”, і “лічыць немагчымым знаходжанне ў адным ваенным саюзе і эканамічнай і мытнай прасторах з Беларуссю і неадкладна выйсці з АДКБ, ЕАЭС і СНД”.

Заява падпісаная партыяй “У імя Рэспублікі”, Еўрапейскай партыяй Арменіі, ГА “Еўропа права”, клубам журналістаў “Аспарэз”.

Ціханоўская падчас саміту Еўрапейскай палітычнай супольнасці (ЕПС) 18 ліпеня ў Вялікабрытаніі падтрымала Арменію ў яе намаганнях па еўраінтэграцыі. Прэм’ер-міністру Ніколу Пашыняну і міністру замежных спраў Арарату Мірзаяну была выказаная падзяка за цвёрдую пазіцыю і падтрымку беларусаў.

Гэта была трэцяя публічная сустрэча Ціханоўскай і Мірзаяна.

20 чэрвеня яны абмеркавалі палітычную сітуацыю ў Беларусі на перамовах у Вільнюсе. На наступны дзень у беларускі МЗС быў выкліканы часовы павераны ў справах Арменіі ў Беларусі Нарэк Тыратуран.

5 кастрычніка 2023 года на палях саміту ЕПС у іспанскай Гранадзе дэмлідар перадала армянскаму народу праз Пашыняна і Мірзаяна словы падтрымкі ў сувязі з тагачаснай сітуацыяй у Нагорным Карабаху.

Сёлета 13 чэрвеня Пашынян заявіў, што ні ён, ні які-небудзь іншы афіцыйны прадстаўнік краіны не паедзе ў Беларусь, пакуль ва ўладзе ў Менску знаходзіцца Аляксандр Лукашэнка. Ён сказаў пра гэта ў кантэксце заяў Лукашэнкі аб карабахскім канфлікце на сустрэчы з прэзідэнтам Азербайджана Ільхамам Аліевым у сярэдзіне траўня. Пасля заявы прэм’ера абедзве краіны адклікалі сваіх амбасадараў у сталіцы для кансультацый.

2 чэрвеня, выступаючы перад парламентам, кіраўнік урада заявіў аб магчымым выхадзе Арменіі з Арганізацыі Дамовы аб калектыўнай бяспецы.

13 ліпеня Беларусь адклікала амбасадара Аляксандра Канюка з Арменіі для кансультацый.