Кіраўнік Мінсельгасхарча Ліневіч узначаліў федэрацыю коннага спорту

23 жніўня, Позірк. Міністр сельскай гаспадаркі і харчавання Анатоль Ліневіч “аднагалосна абраны” новым старшынёй Беларускай федэрацыі коннага спорту (БФКС), паведамляе прэс-служба дзяржаўнага ведамства.

Адзначаецца, што галасаванне праведзена 22 жніўня на “пазачарговай перавыбарнай канферэнцыі” БФКС, якая адбылася ў Рэспубліканскім цэнтры алімпійскай падрыхтоўкі коннага спорту і конегадоўлі.

“Гэтая падзея стала важным крокам у развіцці коннага спорту ў краіне, падкрэсліваючы значнасць адзінства і супрацоўніцтва сярод усіх удзельнікаў галіны”, — гаворыцца ў паведамленні.

Папярэднім кіраўніком федэрацыі быў Сяргей Барташ — кіраўнік Мінсельгасхарча да 27 чэрвеня гэтага года. У гэты дзень ён быў адпраўлены ў адстаўку Аляксандрам Лукашэнкам, новым міністрам стаў Ліневіч.

Зараз Барташ працуе старшынёй Шклоўскага райвыканкама (Магілёўская вобласць).

Да Барташа — з 6 сакавіка 2023 года — БФКС кіраваў Ігар Брыло, на той час таксама міністр сельскай гаспадаркі і харчавання.

14 чэрвеня гэтага года на нарадзе Лукашэнкі з кіраўніцтвам Савета міністраў стала вядома пра затрыманне за хабар больш за 30 чалавек. У іх ліку быў названы былы памочнік Лукашэнкі — інспектар па Віцебскай вобласці, экс-міністр сельскай гаспадаркі і харчавання Брыло.