Кітай і Беларусь дамовіліся сумесна выступаць супраць “падвойных стандартаў у пытаннях дэмакратыі і правоў чалавека”

23 жніўня, Позірк. Кітай і Беларусь “будуць працягваць” падтрымліваць адзін аднаго па напрамках, якія закранаюць узаемныя інтарэсы, “рашуча супрацьстаяць знешнім сілам, якія ўмешваюцца ва ўнутраныя справы іншых краін пад любой падставай”, і выступаць супраць “падвойных стандартаў у пытаннях дэмакратыі і правоў чалавека”.

Пра гэта гаворыцца ў сумеснай заяве ўрадаў дзвюх дзяржаў, апублікаванай Міністэрствам замежных спраў Кітая па выніках першага дня візіту ў Беларусь прэм’ера Дзяржсавета КНР Лі Цяна.

У заяве гаворыцца, што “Беларусь пацвярджае сваю цвёрдую прыхільнасць прынцыпу аднаго Кітая, прызнае, што ў свеце існуе толькі адзін Кітай, Тайвань з’яўляецца неад’емнай часткай тэрыторыі Кітая”.

Кітай у сваю чаргу “падтрымлівае Беларусь на шляху развіцця, абраным яе народам і адпавядаючым яе ўласным інтарэсам, а таксама падтрымлівае намаганні Беларусі па падтрыманні палітычнай стабільнасці і эканамічнага развіцця”.

Паведамляецца, што падчас візіту Лі Цяна бакі абмеркавалі “прымяненне незаконных аднабаковых прымусовых мер, мяркуючы, што гэтыя меры не толькі парушаюць міжнароднае права, у тым ліку Статут ААН, але і супярэчаць адпаведным рэзалюцыям Генеральнай асамблеі ААН”.

“Бакі падтрымліваюць мірнае вырашэнне канфліктаў, канструктыўны двухбаковы дыялог паміж краінамі і міжнароднае супрацоўніцтва, заснаванае на ўзаемнай выгадзе і ўзаемнай павазе”, — падкрэсліваецца ў заяве.

Адзначаецца, што КНР і Беларусь “станоўча выказаліся аб рэалізацыі пагаднення аб узаемным бязвізавым рэжыме паміж дзвюма краінамі”, а таксама маюць намер “умацоўваць супрацоўніцтва ў сферах абароны, юстыцыі, праваахоўнай дзейнасці і бяспекі, паглыбляць супрацоўніцтва, уключаючы падрыхтоўку ваенных кадраў, сумесную барацьбу з кіберзлачыннасцю, транснацыянальнай злачыннасцю”.

Акрамя таго, паведамляецца аб намеры дзвюх дзяржаў “супрацьстаяць усім формам гегеманізму і сілавой палітыкі, працаваць разам над пабудовай новага тыпу міжнародных адносін і выступаць за роўны і спарадкаваны шматпалярны свет”.

Таксама Пекін і Мінск будуць “цвёрда абараняць перамогу ў Другой сусветнай вайне і рашуча выступаць супраць любога скажэння і фальсіфікацыі гісторыі Другой сусветнай вайны”.

Візіт Лі Цяна ў Беларусь праходзіць 22–23 жніўня. Прэм’ер Дзяржсавета КНР прыбыў у Мінск з Масквы, дзе правёў перамовы са сваім калегам Міхаілам Мішусціным і сустрэўся з прэзідэнтам Расіі Уладзімірам Пуціным.

22 жніўня Лі Цян правёў сустрэчу з Аляксандрам Лукашэнкам.

Першапачаткова візіт быў запланаваны на 31 ліпеня, пра што заяўляў, у прыватнасці, пасля нарады ў Лукашэнкі міністр замежных спраў Максім Рыжанкоў.