За 30 гадоў Лукашэнка амаль знішчыў усё, чаго прагнулі беларусы — Латушка

25 жніўня, Позірк. За 30 гадоў ва ўладзе Аляксандр Лукашэнка “амаль знішчыў усё тое, чаго прагнулі беларусы”, заявіў 25 жніўня намеснік кіраўніка Аб’яднанага пераходнага кабінета, кіраўнік Народнага антыкрызіснага ўпраўлення Павел Латушка з нагоды 33-й гадавіны надання статусу канстытуцыйнага закона Дэкларацыі аб дзяржаўным суверэнітэце БССР (прынятая 27 ліпеня 1990 года).

Відэазварот палітык апублікаваў у сваім тэлеграм-канале.

“Самастойнасць страчаная на карысць Расіі, законы не дзейнічаюць, 1.400 палітвязняў знаходзяцца ў турмах, блізу 300.000 фактычна дэпартаваныя з Беларусі, а насельніцтва скарацілася на 1 мільён чалавек з пачатку існавання незалежнай рэспублікі”, — сказаў Латушка.

Паводле яго слоў, “не Лукашэнка стварыў Беларусь” — “краіна належыць беларусам, кожнаму чалавеку, у якога баліць сэрца за сённяшнюю Беларусь, кожнаму, хто верыць у дэмакратычную і еўрапейскую краіну, хто працягвае дзейнічаць, нягледзячы на ўсе рэпрэсіі”.

Палітык нагадаў пра падзеі 25 жніўня 1991 года, калі “Вярхоўны савет прагаласаваў за наданне Дэкларацыі аб дзяржаўным суверэнітэце статусу канстытуцыйнага закона”.

“Менш чым праз месяц, 19 верасня 1991 года, з’явілася афіцыйная назва “Рэспубліка Беларусь”. Дзяржаўнымі сімваламі нашай краіны сталі герб “Пагоня” і бел-чырвона-белы сцяг. Пасля некалькіх стагоддзяў барацьбы беларусы атрымалі сваю незалежную краіну, самастойнасць і паўнату дзяржаўнай улады рэспублікі ў межах яе тэрыторыі, правамоцнасць яе законаў, незалежнасць рэспублікі ў знешніх адносінах”, — адзначыў Латушка.

Ён заклікаў беларусаў “ніколі не губляць веру”. “Перш за ўсё веру ў сябе, у свае сілы, веру ў праўду, якую не схаваеш ніякай прапагандай, веру ў Беларусь”, — скрэсліў ён.