Чатыры пасажыры ў бальніцы пасля сутыкнення двух аўтобусаў у Магілёве

26 жніўня, Позірк. Чатырох пасажыраў даставілі ў шпіталь для агляду пасля сутыкнення двух аўтобусаў “МАЗ” у Магілёве раніцай 26 жніўня, паведамляе УУС Магілёўскага аблвыканкама.

Аварыя з удзелам маршрутных аўтобусаў № 23 і № 11 адбылася на скрыжаванні пр-та Міра і вул. Каралева. Праводзіцца праверка, акалічнасці здарэння высвятляюцца.

У мінулыя выхадныя ДАІ і транспартная інспекцыя Міністэрства транспарту і камунікацый праводзілі прафілактычныя мерапрыемствы, скіраваныя на выкананне кіроўцамі міжнародных аўтобусаў правілаў дарожнага руху, рэжыму працоўнага часу і адпачынку, прадухіленне ДТЗ і зніжэнне цяжкасці іх наступстваў.

Неабходнасць прафілактыкі, як было заяўлена, звязаная з аварыямі, якія пачасціліся ў жніўні праз стомленасць кіроўцаў аўтобусаў.

Раніцай 21 жніўня ў выніку сутыкнення фургона “Мэрсэдэс” і пасажырскага аўтобуса “МАЗ” на скрыжаванні аўтадарог Р-78 і Р-81 паблізу вёскі Стараволя (Пружанскі раён Брэсцкай вобласці) загінула тры чалавекі. Сярод загінулых пасажыры аўтобуса (45-гадовы мужчына і 17-гадовая дзяўчына), а таксама 24-гадовы кіроўца фургона. Яшчэ 10 пасажыраў аўтобуса даставілі ў бальніцу.

У той жа дзень на трасе М4 (Мінск — Магілёў) непадалёк ад вёскі Мартыянаўка ў Бярэзінскім раёне Мінскай вобласці кіроўца аўтобуса, які рушыў з Вільнюса ў Магілёў, з’ехаў у кювет, верагодна, заснуўшы за рулём. У салоне знаходзіліся 19 пасажыраў. Пяць чалавек даставілі ў бальніцу, пасля абследавання іх адпусцілі дадому.

18 жніўня кіроўца аўтобуса, які рушыў з Масквы ў Брэст, заснуў за рулём, з’ехаў у кювет і ўрэзаўся ў дрэвы. Гэта адбылося ў Дзяржынскім раёне (Мінская вобласць) на трасе М1 (Брэст — Мінск — мяжа РФ). Паводле інфармацыі Міністэрства аховы здароўя, у ДТЗ пацярпела дзевяць чалавек.

У выніку сутыкнення аўтобуса з грузавіком раніцай 16 красавіка ў Мінску пацярпела мінімум 20 чалавек, у тым ліку двое непаўналетніх.