Дзяржпагранкамітэт: За тыдзень Беларусь на падставе бязвізу наведала 5.424 жыхары краін Еўропы
26 жніўня, Позірк. З 19 па 26 жніўня Беларусь у бязвізавым парадку наведала 5.424 жыхары краін Еўропы (тыднем раней — 5.687), вынікае з даных Дзяржаўнага пагранічнага камітэта.
Сярод іншых у краіну накіравалася 2.172 грамадзяніны і неграмадзяніны Латвіі, 692 грамадзяніны Польшчы, 1.875 грамадзян Літвы і 685 грамадзян іншых еўрапейскіх дзяржаў з пашыранага пераліку.
З 19 ліпеня Беларусь наведала больш як 3.300 замежнікаў — жыхароў 35 еўрапейскіх краін з пашыранага спісу. Па-ранейшаму пераважаюць грамадзяне Германіі (38%). У тройку краін, грамадзяне якіх часцей за астатніх наведвалі Беларусь, уваходзяць Эстонія і Італія.
Паводле даных Дзяржпагранкамітэта, правам бязвізавага ўезду ў Беларусь ад пачатку дзеяння гэтага рэжыму скарысталася 948.948 замежнікаў.
З пачатку года Беларусь на падставе бязвізу наведала 148.342 замежнікі, у тым ліку 3.335 жыхароў дзяржаў з пашыранага спісу.
Бязвізавы рэжым дзейнічае з 15 красавіка 2022 года для жыхароў Латвіі і Літвы, з 1 ліпеня таго ж года — для жыхароў Польшчы. Аляксандр Лукашэнка некалькі разоў падаўжаў яго тэрмін, апошні раз — да канца 2024 года.
19 ліпеня беларускія ўлады распаўсюдзілі бязвізавы рэжым на грамадзян яшчэ 35 краін Еўропы. Большасць з іх рэжым Лукашэнкі лічыць “недружалюбнымі” за тое, што ўвялі санкцыі альбо далучыліся да іх.
Згодна з апублікаванай 17 ліпеня заявай Міністэрства замежных спраў, гаворка пра жыхароў Аўстрыі, Андоры, Бельгіі, Балгарыі, Босніі і Герцагавіны, Ватыкана, Вялікабрытаніі, Венгрыі, Германіі, Грэцыі, Даніі, Ірландыі, Ісландыі, Іспаніі, Італіі, Кіпра, Ліхтэнштэйна, Люксембурга, Мальты, Манака, Нідэрландаў, Нарвегіі, Партугаліі, Румыніі, Сан-Марына, Паўночнай Македоніі, Славакіі, Славеніі, Фінляндыі, Францыі, Харватыі, Чэхіі, Швейцарыі, Швецыі і Эстоніі.
Яны могуць уязджаць у Беларусь без візы праз усе наземныя і паветраныя міжнародныя пункты пропуску “па сапраўдных дакументах”, знаходзіцца на беларускай тэрыторыі “не больш за 30 сутак з дня ўезду”.