Грамадзянін Самалі затрыманы пры спробе выехаць з Беларусі ў Літву з падробленым пашпартам

28 жніўня, Позірк. Грамадзянін Самалі з “часткова падробленым пашпартам” затрыманы 26 жніўня ў пункце пропуску Каменны Лог (з літоўскага боку — Мядзінінкай), паведамляе прэс-служба Дзяржаўнага памежнага камітэта.

Як адзначае ведамства, ён спрабаваў выехаць у Літву рэйсавым аўтобусам Гомель — Вільнюс.

Удакладняецца, што мужчына прад’явіў на мяжы пашпарт грамадзяніна Самалі з замененай старонкай, на якой утрымліваюцца “ўстановачныя даныя”. У ЕС ён накіроўваўся “ў пошуках лепшых умоў жыцця”.

ДПК падкрэсліў, што за спробу незаконнага перасячэння мяжы прадугледжаны штраф у памеры да 100 базавых велічынь (4.000 рублёў) і дэпартацыя. За выкарыстанне падробленага дакумента прадугледжаная крымінальная адказнасць з максімальным пакараннем у выглядзе двух гадоў абмежавання волі.

19 ліпеня ў Нацыянальным аэрапорце Мінск пры афармленні на рэйс у Дубай быў затрыманы грамадзянін Ірана з часткова падробленым пашпартам. Тады мужчыну пакінулі ў ІЧУ для высвятлення асобы.

26 ліпеня ў Каменным Логу пры афармленні на выезд з Беларусі рэйсавага аўтобуса Мінск — Вільнюс быў затрыманы мужчына, які прад’явіў пашпарт грамадзяніна Украіны з частковай падробкай — старонка з установачнымі данымі была замененая. Мужчына меў намер трапіць у Германію да сваіх сыноў, якія і зрабілі яму падроблены ўкраінскі дакумент, выслаўшы яго па пошце.