Міграцыйнае агенцтва Швецыі пераглядзіць справы аб прытулку для беларусаў
29 жніўня, Позірк. Міграцыйнае агенцтва Швецыі гэтай восенню правядзе перагляд спраў аб прытулку з Беларусі, паведамляе “Народная амбасада” Беларусі ў Швецыі са спасылкай на Sveriges Radio.
“Мы ўсведамляем гэтую інфармацыю і крытыку, якая была выказана ў наш адрас”, — заявіла намесніца юрыдычнага кіраўніка Міграцыйнага савета Анна Ліндблад.
Як адзначыў прадстаўнік “Народнай амбасады” Дзмітрый Васэрман, дыялог беларускага боку з міграцыйным агенцтвам быў адноўлены “пасля таго, як у ліпені аператару Сяргея Ціханоўскага, Канстанціну Сярогіну, зноў адмовілі ў наданні прытулку, гэтым разам у міграцыйным судзе”.
“Гэты выпадак падкрэсліў, што, нягледзячы на абнаўленне інфармацыі аб Беларусі міграцыйным агенцтвам у лютым гэтага года, якая больш дакладна адлюстроўвае рэальнасць масавага тэрору ў краіне, агенцтва працягвае падтрымліваць свае папярэднія рашэнні ў судзе”, — адзначыў Васэрман.
“Народная амбасада” паведаміла, што рашэнне міграцыйнага агенцтва Швецыі аб пераглядзе спраў беларусаў было прынята на пачатку тыдня, яшчэ да таго як апошні выпадак аб дэпартацыі стаў вядомым публічна і не звязана з ім.
“Мы вітаем абнаўленне інфармацыі, аднак лічым крытычна важным, каб перагляд спраў беларусаў і беларусак аб наданні прытулку праводзіўся на фоне мараторыя на іх дэпартацыю. Гэта перашкодзіць высылцы тых беларусаў, па якіх ужо былі прыняты рашэнні. Мы будзем працягваць дыялог з міграцыйным агенцтвам, каб забяспечыць прыняцце рашэння аб мараторыі на дэпартацыі”, — адзначыў прадстаўнік ініцыятывы.
Аб тым, што грамадзянін Беларусі, якому міграцыйная служба Швецыі адмовіла ў прадастаўленні прытулку, затрыманы па палітычных матывах па вяртанні на радзіму, паведаміла 28 жніўня шведскае Sveriges Radio.
Адзначаецца, што ён прыбыў у краіну з маці два гады таму. Прытулку папрасілі, бо “абодва ўдзельнічалі ў шырокамаштабных акцыях пратэсту пасля прэзідэнцкіх выбараў 2020 года”.
Паводле інфармацыі СМІ, у заявах на атрыманне міграцыйнага статусу гаворыцца, што ў Беларусі супраць маці і сына ўзбуджана крымінальная справа, і “яны баяцца, што іх пасадзяць у турму”.
Нягледзячы на гэта, іх прашэнні былі адхіленыя.
Гэта адбылося яшчэ ў 2023 годзе, а на мінулым тыдні, як сцвярджаецца, мужчыну і ягоную маці дэпартавалі са Швецыі ў Беларусь.
Адзначаецца, што беларуса “арыштавалі проста на мяжы”. Аб лёсе жанчыны не паведамляецца.
Офіс дэмакратычнага лідара Святланы Ціханоўскай (ОСТ) з мінулага тыдня сочыць за справай, звязанай з высыланнем на радзіму затрыманага пасля беларускага грамадзяніна і “ўдзячныя “народнаму пасольству” ў Швецыі за тое, што звярнулі ўвагу на гэты выпадак”, заявіў у каментары “Позірку” 28 жніўня галоўны дарадца палітыка Франак Вячорка.
“Цяпер спрабуем высветліць усе абставіны справы, і калі інфармацыя пацвердзіцца, будзем рабіць усё магчымае, каб не дапусціць паўтарэння такіх сітуацый у будучыні. Мы прапануем увесці мараторый на высылку беларускіх грамадзян у Беларусь”, — заявіў Вячорка.