Лукашэнка прапанаваў Малайзіі “актывізаваць кантакты”

31 жніўня, Позірк. Аб жаданні “актывізаваць двухбаковыя кантакты” гаворыцца ў віншаванні Аляксандра Лукашэнкі вярхоўнаму кіраўніку Малайзіі султану Ібрагіму з Днём незалежнасці.

Паводле слоў віншавальніка, якія перадае яго прэс-служба, Мінск і Куала-Лумпур “падзяляюць погляды па шырокаму колу пытанняў міжнароднага парадку дня”, а таксама “падтрымліваюць далейшы рух па будаўніцтве шматпалярнага свету”.

“Беларусь адкрытая да супрацоўніцтва ў галінах сельскай гаспадаркі, прамысловасці, паставак прадуктаў харчавання, інфармацыйных тэхналогій, адукацыі”, — заяўляе Лукашэнка.

“Спадзяемся на <…> правядзенне ўзаемных візітаў на розных узроўнях, гатовыя да сумеснай дзейнасці па развіцці дагаворна-прававой базы”, — гаворыцца ў віншаванні.

Віншуючы папярэдняга вярхоўнага кіраўніка Абдулу II 31 жніўня 2023 года, ён назваў двухбаковыя адносіны “плённымі”.

Падчас прызначэння Рамана Раманоўскага паслом у Інданезіі і Малайзіі па сумяшчальніцтве 20 лістапада таго ж года Лукашэнка заявіў, што ўлады Беларусі “не вельмі абгрунтаваліся” ў тым рэгіёне, здараюцца толькі “эпізадычныя гандлёва-эканамічныя кантакты”. “Трэба замацоўвацца. І Інданезія, і Малайзія, ды і Сінгапур — гэта цікавыя для нас краіны, і ўсюды мы павінны паўтара, два, тры праекты знайсці. Гэта ваша задача”, — сказаў ён.

Паводле статыстычных даных ААН, экспарт Малайзіі ў Беларусь па выніках 2023 года склаў 112,4 млн долараў (пры гэтым за 2022-ы — 5 млн, 2021-ы — 3,9 млн, 2020-ы — 5,9 млн, 2019-ы — 4 млн, 2018-ы — 7,3 млн), імпарт — 21,8 млн (18,8 млн, 51,2 млн, 30,9 млн, 37,1 млн, 74,8 млн адпаведна).