Адзін з расійскіх беспілотнікаў, якія атакавалі Украіну, заляцеў у Беларусь — УСУ

31 жніўня, Позірк. Адзін з ударных беспілотных лятальных апаратаў (БПЛА), якія атакавалі Украіну ў ноч на 31 жніўня, заляцеў у паветраную прастору Беларусі, паведамляе прэс-служба Паветраных сіл УСУ.

Усяго мінулай ноччу Украіну атакавалі 52 расійскія беспілотнікі іранскай вытворчасці “Шахед-131/136”, адзначаецца ў паведамленні. Украінскія сілы СПА збілі 24 БПЛА, 25 “лакацыйна страчана (упалі самастойна)”, два “паляцелі ў кірунку расіі”, яшчэ адзін — у “рэспубліку беларусь”, удакладняюць ПС УСУ (цытаты прыведзеныя ў перакладзе з украінскай мовы з захаваннем арфаграфіі).

Раней паведамлялася, што ў ноч на 27 жніўня ўкраінская супрацьпаветраная абарона знішчыла 60 з 81 запушчанага Расіяй ударных беспілотніка. Адзін з беспілотнікаў пры гэтым “перасёк мяжу з Беларуссю”.

Пра беспілотнікі, што запускае РФ, якія з’яўляюцца ў небе Беларусі, перыядычна паведамляе маніторынгавая група “Беларускі Гаюн”. Паводле яе інфармацыі, у ноч на 27 жніўня ў краіну заляцела не менш за шэсць БПЛА, як мінімум адзін трапіў на тэрыторыю Гомельскай вобласці ў раёне Прыпяцкага радыяцыйна-экалагічнага запаведніка.

У ноч на 26 жніўня, паводле інфармацыі УСУ, беларускую мяжу перасеклі два “Шахеды”.

16 ліпеня Паветраныя сілы Украіны таксама паведамлялі, што два запушчаныя РФ “Шахеды” былі “лакальна страчаныя” ў паветранай прасторы Беларусі.

8 жніўня беларускі дэмакратычны лідар Святлана Ціханоўская заявіла, што ў ліпені, паводле яе звестак, мінімум дзевяць “Шахедаў”, якія належаць Расіі, уварваліся ў паветраную прастору Беларусі.

Якіх-небудзь пратэстаў расійскаму боку ў сувязі са згаданымі інцыдэнтамі афіцыйным Мінскам заяўлена не было.

Пры гэтым Аляксандр Лукашэнка 10 жніўня абвінаваціў Украіну ў парушэнні беларускай паветранай прасторы беспілотнымі лятучымі апаратамі і заявіў, што загадаў вярнуць войскі да паўднёвай мяжы.