У Гомельскай вобласці КДК спагнаў з тых, хто не адпрацаваў па размеркаванні больш за 120 тыс. рублёў

5 верасня, Позірк. У Гомельскай вобласці больш за 30 выпускнікоў вышэйшых ці сярэдне-спецыяльных навучальных устаноў не адпрацавалі “належны тэрмін па размеркаванні”, паведамляе прэс-служба Камітэта дзяржкантролю.

У ходзе праверкі супрацоўнікі ведамства ўстанавілі, што ў шэрагу ВНУ і ССНУ рэгіёну “не быў забяспечаны належны кантроль за выкананнем выпускнікамі ўстаноўленага тэрміну адпрацоўкі”.

Акрамя таго, асобныя ўстановы адукацыі “не забяспечылі зваротную сувязь з наймальнікамі, да якіх размяркоўваліся выпускнікі, у тым ліку пры іх звальненні з-за невыканання працоўнага заканадаўства (напрыклад, за прагулы)”.

Тыя, хто не адпрацаваў належны тэрмін, “не кампенсавалі ў бюджэт каля 300 тыс. рублёў, затрачаных дзяржавай на іх падрыхтоўку і навучанне”, гаворыцца ў рэлізе.

Сумесныя меры, прынятыя абласным КДК і ўстановамі адукацыі, “дазволілі спагнаць у бюджэт больш за 120 тыс. рублёў”.

Як сцвярджаецца, “аналагічная праца” праводзіцца і ў іншых рэгіёнах краіны. У прыватнасці, у Мінску ў бюджэт “спагнана 76 тыс. рублёў, затрачаных дзяржавай на падрыхтоўку выпускнікоў дзвюх сталічных ВНУ”.

У адпаведнасці з Кодэксам аб адукацыі выпускнікі, якім месца работы прадастаўлена шляхам размеркавання або накіравання, абавязаны адпрацаваць тэрмін абавязковай работы (для выпускнікоў ВНУ гэты тэрмін складае два гады, пры падрыхтоўцы па мэтаваму набору — пяць гадоў, для выпускнікоў ССНУ — тры гады).