На волю выйшла палітзняволеная Вікторыя Гаўрыліна, заявіў Васкрасенскі

5 верасня, Позірк. Аб памілаванні палітвязні Вікторыі Гаўрылінай заявіў 4 верасня ў эфіры тэлеканала СТБ прапагандыст Юрый Васкрасенскі.

Паводле яго слоў, прадпрымальніцу, танцорку, маці дваіх дзяцей з Гомеля з калоніі забралі сваякі.

Паводле даных праваабарончага цэнтру “Вясна”, Гаўрыліну разам з мужам затрымалі 27 студзеня 2023 года. Муж пасля 30-сутачнага арышту выйшаў на волю, а яе абвінавацілі па трох артыкулах Крымінальнага кодэкса: 203¹ (незаконныя дзеянні ў дачыненні да інфармацыі аб прыватным жыцці і персанальных дадзеных), 243 (ухіленне ад выплаты падаткаў, збораў), 361² (фінансаванне экстрэмісцкай дзейнасці).

Праваабарончая супольнасць 4 траўня прызнала яе палітвязнем.

18 верасня Гомельскі абласны суд шляхам частковага складання прыгаварыў жанчыну да трох гадоў і трох месяцаў пазбаўлення волі ў калоніі агульнага рэжыму з назначэннем штрафу ў памеры 100 базавых велічынь.

Пакаранне адбывала ў папраўчай калоніі №4 (Гомель).

7 жанчын і 23 мужчыны, “асуджаныя за злачынствы пратэстнай накіраванасці”, памілаваны ў адпаведнасці з падпісаным Аляксандрам Лукашэнкам указам № 343, паведаміла 4 верасня яго прэс-служба. Як сцвярджаецца, большасць з іх — бацькі непаўналетніх і малалетніх дзяцей.

Памілаваныя былі пазбаўленыя волі за каментары ў інтэрнэце, вынікае са слоў генеральнага пракурора Андрэя Шведа.

16 жніўня Лукашэнка таксама падпісаў указ аб памілаванні 30 асоб, асуджаных за злачынствы “пратэстнай накіраванасці”.

Сярод памілаваных 14 жанчын і 16 мужчын, “некаторыя з іх маюць сур’ёзныя захворванні”, “ёсць асобы пенсійнага ўзросту”, гаварылася ў паведамленні прэс-службы Лукашэнкі.

Праваабаронцам было вядома пра 25 палітвязняў, якія выйшлі на волю па памілаванні ў межах жнівеньскага ўказу. Названы імёны 15 з іх: Ксенія Луцкіна, Ірына Санкоўская, Васіль Бераснеў, Наталля Пятровіч, Вольга Новікава, Ала Зуева, Вольга Страбоўская, Кацярына Леў, Тамара Каравай, Святлана Паўэктава, Яўген Чуміла, Павел Кучынскі, Руслан Красоў, Аляксандр Галуза, Алег Зыкун.

У пачатку ліпеня праваабаронцы паведамлялі аб выхадзе 18 палітвязняў, якое адбылося пасля заявы Лукашэнкі аб вызваленні яго “вельмі цяжкахворых” апанентаў.

Старшыня Вярхоўнага суда Валянцін Сукала паведаміў, што пасля згаданай заявы было вызвалена 14 чалавек. Сярод іх анкахворы Рыгор Кастусёў, а таксама Дар’я Лосік, Тамара Астрэйка, Святлана Лупач, Кацярына Мадзянкова і Паліна Палавінка.