Эканамічныя ведамствы Беларусі і РФ абмеркавалі павелічэнне паставак беларускіх ліфтаў

5 верасня, Позірк. Пытанні павелічэння паставак у Расію беларускіх ліфтаў абмеркаваны 5 верасня на пасяджэнні двухбаковай міжведамаснай рабочай групы эканамічных ведамстваў дзвюх краін, паведаміла Мінэканомікі Беларусі.

Іншымі пытаннямі парадку дня сталі абнуленне ставак мытных пошлін у ЕАЭС на дызельныя рухавікі, у чым Беларусь “разлічвае на падтрымку Расіі”, а таксама “спалучэнне нацыянальных сегментаў сістэм электронных пашпартоў транспартных сродкаў, створаных у Беларусі і Расіі”. Яно неабходнае для “забеспячэння экспарту вырабленых у Беларусі транспартных сродкаў на расійскі рынак”.

Паводле інфармацыі на сайце беларускага вытворцы ліфтаў “Магілёўліфтмаш”, з 92 замежных дылераў прадпрыемства 64 знаходзяцца ў Расіі. Там таксама паведамляецца (https://www.liftmach.by/media/articles/ReklamnayastatyaOAOMogilevliftmashvzhurnaleLiftinforma9312ot2023goda/) аб падпісаным падчас візіту ў Беларусь дэлегацыі так званай “данецкай народнай рэспублікі” (даты візіту не паказваюцца) пагаднення аб супрацоўніцтве з ААТ “Магілёўліфтмаш”, вынікам якога можа стаць стварэнне на акупаванай Расіяй тэрыторыі Украіны зборачнай вытворчасці беларускага прадпрыемства.

Кіраўнік “днр” Дзяніс Пушылін наведваў Беларусь 27 ліпеня 2022 года. Аляксандр Лукашэнка сустрэўся з ім 18 красавіка 2023 года ў Мінску. Летась 15 чэрвеня амбасадар Беларусі ў РФ (цяпер кіраўнік адміністрацыі Лукашэнкі) Дзмітрый Круты падпісаў з Пушыліным “пагадненне аб пашырэнні партнёрства”.

У жніўні 2023 года Беларусь наведвала дэлегацыя “днр” на чале з кіраўніком яе “ўрада”.

30 верасня 2022 года Уладзімір Пуцін падпісаў “дакументы” аб уваходжанні ў склад РФ “данецкай і луганскай народных рэспублік”, а таксама “Запарожскай і Херсонскай абласцей”. За некалькі дзён да гэтага на акупаваных украінскіх тэрыторыях пад кантролем расійскіх вайскоўцаў прайшлі адпаведныя”рэферэндумы”.

На пачатку гэтага года Савет Рэспублікі Нацыянальнага сходу Беларусі дэ-факта прызнаў сепаратысцкія ўтварэнні “днр”і ” лнр”. 6 студзеня на сайце верхняй палаты беларускага парламента з’явіўся прэс-рэліз, з якога вынікала, што член СР НС Дзмітрый Баскаў “узяў удзел у акцыі фонду [паралімпійца] Аляксея Талая ў арганізацыі знаходжання школьнікаў з Данецкай і Луганскай рэспублік у Мінску ў перыяд зімовых школьных вакацый”.

Разам з тым дэ-юрэ беларускія ўлады не прызналі незалежнасць “днр” і “лнр”, роўна як іх “далучэнне” да Расіі пасля “рэферэндумаў”, пры гэтым афіцыйны Мінск ухваляе агрэсію РФ супраць Украіны.

Завод” Магілёўліфтмаш ” заснаваны ў 1969 годзе. З 2014 года аднайменнае ААТ стала кіруючай кампаніяй холдынгу “Магілёўліфтмаш”. У яго склад уваходзяць таксама ААТ “Зеніт” (Магілёў), ААТ “Завод “Ветразь” (Бягомль, Докшыцкі раён, Віцебская вобласць).