Праваабаронцы прызналі былымі палітвязнямі яшчэ 19 чалавек

6 верасня, Позірк. Беларуская праваабарончая супольнасць прызнала былымі палітвязнямі яшчэ 19 чалавек.

Згодна з сумеснай заявай, адпаведны статус атрымалі Уладзіслаў Фёдараў, Надзея Пташынская, Дзяніс Котаў, Святлана Котава, Валерый Іўчын, Міхаіл Пішчала, Андрэй Сямчук, Таццяна Палонская, Аляксей Палюховіч, Наталля Харытонава-Крыжэвіч, Андрэй Савін, Рамуальда Дэкола, Павел Цімашэнка, Уладзімір Матырка, Таццяна Мініна, Ганна Мароз, Сяргей Мыц, Валерый Нямкевіч, Ігар Несцяровіч.

Праваабаронцы расцэньваюць пераслед гэтых асоб як “палітычна матываваны пераслед у сувязі з рэалізацыяй імі свабоды мірных сходаў, права на асацыяцыю і свабоды выказвання свайго меркавання ў дачыненні да абвешчаных вынікаў выбараў прэзідэнта Рэспублікі Беларусь і іншых грамадска значных падзей”.

Аўтары дакумента патрабуюць перагледзець крымінальныя справы ў дачыненні да пералічаных грамадзян і адмяніць вынесеныя выракі, цалкам рэабілітаваць былых палітвязняў, пакрыўшы ім усю шкоду, прычыненую адвольным асуджэннем і пазбаўленнем волі.

Апрача “Вясны” заяву падпісалі Беларускі ПЭН, Беларускі дом правоў чалавека імя Барыса Звозскава, “Прававая ініцыятыва”, Офіс па правах людзей з інваліднасцю, Lawtrend.

Праваабарончая супольнасць пачала надаваць статус былых палітвязняў людзям, якія яго не мелі падчас знаходжання ў няволі, увосень 2023 года. 18 верасня такімі прызналі 150 чалавек, 25 кастрычніка — 39, 17 студзеня 2024 года — 14, 24 студзеня — 9, 28 лютага — 22, 22 сакавіка — 20, 28 сакавіка — 46, 3 траўня — 26, 3 чэрвеня — 29, 24 чэрвеня — 22, 13 жніўня — 22. Такім чынам, іх агульная колькасць дасягнула 421.

На 6 верасня ў Беларусі 1.370 чалавек, якіх праваабарончая супольнасць прызнае палітвязнямі. Рэальная колькасць людзей, якія зазналі рэпрэсіі у той ці іншай форме, значна большая.