Прадстаўнік Мінабароны: З пачаткам СВА тактыка танкавых падраздзяленняў змянілася

8 верасня, Позірк. “З пачаткам спецыяльнай ваеннай аперацыі на Украіне дзеянні танкавых падраздзяленняў і іх тактыка сур’ёзна змяніліся”, — заявіў начальнік бранятанкавага ўпраўлення Мінабароны Беларусі Віталь Кільчэўскі ў інтэрв’ю праграме “Арсенал” на тэлеканале “Беларусь 1” 8 верасня.

Паводле яго, танкі “адведзены ад лініі баявога судакранання і ў асноўным вядуць агнявое ўздзеянне на праціўніка з закрытых агнявых пазіцый”.

Танк “застаўся той баявой сілай, якой быў увесь час, аднак яго аблічча значна змянілася”, сказаў Кільчэўскі.

Прадстаўнік ведамства паведаміў аб мадэрнізацыі танкавага парку беларускай арміі, у тым ліку з ужываннем “мер абароны” ад беспілотных лятальных апаратаў.

Дзень танкіста ў Беларусі адзначаецца ў другую нядзелю верасня.

У віншаванні, апублікаваным прэс-службай Аляксандра Лукашэнкі 8 верасня, ён выказаў перакананне, што танкавыя часткі і падраздзяленні “і надалей будуць надзейным шчытом для краіны і народа ад памкненняў любых агрэсараў, гарантам міру і бяспекі”.

Воіны-танкісты беларускай арміі “годна працягваюць баявыя традыцыі сваіх папярэднікаў, паспяхова асвойваючы новыя і мадэрнізаваныя ўзоры бранятанкавай тэхнікі, дэманструюць высокі ўзровень прафесійнай падрыхтоўкі падчас мерапрыемстваў аператыўнай і баявой падрыхтоўкі”, сцвярджае міністр абароны Віктар Хрэнін у сваім віншаванні.

Тэрмінам “спецыяльная ваенная аперацыя (СВА)” расійскія і беларускія ўлады называюць поўнамаштабную вайну, якая вядзе РФ супраць Украіны пры падтрымцы афіцыйнага Мінска з 24 лютага 2022 года.