ЕАБР: Рост крэдытаў і даходаў у Беларусі падтрымлівае высокую спажывецкую актыўнасць

9 верасня, Позірк. “Рост крэдытаў і павелічэнне даходаў насельніцтва” ў Беларусі “падтрымліваюць высокую спажывецкую актыўнасць”, гаворыцца ў штотыднёвым макрааглядзе Еўразійскага банка развіцця.

Аналітыкі звярнулі ўвагу на тое, што ў краіне “захоўваецца рост крэдытавання ў нацыянальнай валюце”.

“Аб’ём крэдытаў у рублях, выдадзеных банкамі, вырас на 2,8% м/м (месяц да месяца. — “Позірк”.) у ліпені пасля 1,1% м/м у чэрвені, — гаворыцца ў дакуменце. — Крэдытаванне ў карпаратыўным сегменце павялічылася на 3% м/м у ліпені пасля 0,3% м/м месяцам раней. Рост рознічнага крэдытавання склаў 2,5% м/м (пасля 2,1% у папярэднім месяцы), палова з якога была сфармаваная павелічэннем спажывецкага крэдыту (3,7% м/м). З пачатку года спажывецкія крэдыты павялічыліся на 21,6%”.

Паводле даных Нацыянальнага банка, за студзень — ліпень банкі выдалі фізічным асобам крэдыты на агульную суму 9 млрд 101,2 млн рублёў (+29,3% у гадавым выражэнні; за аналагічны перыяд 2023 года — 7 млрд 39 млн). Пратэрмінаваная запазычанасць фізічных асоб па крэдытах на 1 жніўня склала 40,4 млн рублёў — на 17,1% больш, чым на тую ж дату 2023-га (34,5 млн).