Пратасевіч сцвярджае, што прызначаны яму ў рамках “справы Nexta” штраф скасаваны
9 верасня, Позірк. Экс-рэдактар медыяпраектаў Nexta і “Беларусь галаўнога мозгу” Раман Пратасевіч сцвярджае, што прызначаны яму ў рамках “справы Nexta” штраф скасаваны.
Былы апазіцыйны актывіст паведаміў пра гэта падчас сумеснага стрыму прапагандыстаў Людмілы Гладкай і Канстанціна Прыдыбайлы, адказваючы на пытанне, як ён змог вылецець у Аб’яднаныя Арабскія Эміраты пры наяўнасці запазычанасці.
“Некаторы час таму я падаў апеляцыю, і ўвогуле мне скасавалі гэты штраф, — сказаў Пратасевіч. — Так што ўсё сумленна, усё законна. Гэта была афіцыйная працэдура <…>, гэта былі асобныя судовыя пасяджэнні. Ну і я, як мне здаецца, прывёў дастатковую колькасць аргументаў для таго, каб вось гэты вось вялізны, я б нават сказаў, астранамічны штраф скасавалі. Адзін з маіх аргументаў <…> — гэта хутчэй была сума шкоды, якую ў цэлым панесла дзяржава. Мая пазіцыя заключалася ў тым, што я не магу адзін несці адказнасць за ўсіх, бо гэта будзе як мінімум несправядліва і несумленна”.
Паводле слоў экс-апазіцыянера, апошнія тры месяцы ён працуе “зваршчыкам на прадпрыемстве ў сферы энергетыкі” (на пачатку верасня фатаздымак з ім апублікаваў тэлеграм-канал Мінскага электратэхнічнага завода імя Казлова), адзначыўшы, што з гэтай прычыны ў яго не ўзнікла цяжкасці, каб заплаціць нейкія “3 тысячы рублёў па лініі падатковай”.
7 траўня суд Мінскага раёна разгледзеў грамадзянскі іск дзяржаўных органаў у дачыненні да ўдзельнікаў медыяпраекта Nexta Рамана Пратасевіча, Яна Рудзіка і Сцяпана Пуцілы і пастанавіў спагнаць з іх у даход дзяржавы 23,8 млн рублёў.
Згодна з рашэннем суда, 21 млн рублёў павінен быць выплачаны “ў салідарным парадку” з палітвязнямі Сяргеем Ціханоўскім, Мікалаем Статкевічам, Арцёмам Сакавым, Дзмітрыем Паповым, Ігарам Лосікам, асуджанымі на працяглыя тэрміны пазбаўлення волі па адной справе.
Гаворка ідзе пра шкоду, нібыта нанесеную падчас масавых акцый пратэсту ў 2020 годзе.
Асноўная частка выплат павінна была пайсці МУС. Расходы ведамства на забеспячэнне транспартных выдаткаў, паводле судовага рашэння, склалі больш за 1 млн 404 тыс. рублёў, на камандзіровачныя выдаткі — больш за 286 тыс. Таксама згаданыя выдаткі на лячэнне пацярпелых падчас пратэстаў супрацоўнікаў, страхавыя выплаты ім і харчаванне пры ўзмоцненым нясенні службы курсантамі.
Міністэрства абароны ацаніла сваю шкоду ў памеры больш за 2 млн рублёў, Міністэрства па надзвычайных сітуацыях — 79 тыс. рублёў.
У траўні Пратасевіч, каментуючы на сваім ютуб-канале рашэнне суда, заявіў, што яно стала для яго шокам. Тады блогер адзначыў, што не мае працы, уласнасці, таму не ў стане выплаціць неабходную суму. “З’ехаць, плаціць усё жыццё 50% ад любога майго даходу або лезці ў пятлю”, — абмаляваў ён свае перспектывы.
Пратасевіч і яго сяброўка расіянка Сафія Сапега былі затрыманыя 23 траўня 2021 года ў выніку арганізаванай беларускімі ўладамі вымушанай пасадкі ў Мінску самалёта Ryanair, які ляцеў з Афін у Вільнюс.
Мінскі абласны суд 3 траўня 2023 года прыгаварыў на той момант палітвязня Пратасевіча, які пайшоў на супрацоўніцтва са следствам, да 8 гадоў пазбаўлення волі ва ўмовах узмоцненага рэжыму. Іншых фігурантаў “справы Nexta” судзілі завочна на падставе працэдуры спецыяльнай вытворчасці. Рудзіка прыгаварылі да 19 гадоў зняволення, Пуцілу — да 20 гадоў.
Пры накіраванні крымінальнай справы ў суд Генпракуратура “ў інтарэсах дзяржавы” заявіла іск аб пакрыцці абвінавачанымі маёмаснай шкоды на агульную суму больш як 30 млн рублёў.
22 траўня 2023 года Пратасевіч быў памілаваны. Сапегу, асуджаную на 6 гадоў зняволення, памілавалі ў чэрвені.
Нягледзячы на памілаванне, 1 снежня 2023 года МУС унесла Пратасевіча ў “экстрэмісцкі спіс” з паметкай “судзімасць не пагашаная”. У лютым 2024-га яго выключылі з гэтага спісу.