Смяротныя аварыі здарыліся 12 верасня ў Рагачоўскім раёне і Мінску

12 верасня, Позірк. 71-гадовы кіроўца легкавога аўтамабіля “Форд” і яго 61-гадовая пасажырка загінулі ў выніку аварыі, якая здарылася 12 верасня каля 8:00 у Рагачоўскім раёне (Гомельская вобласць), паведамляе прэс-служба Міністэрства ўнутраных спраў.

Паводле папярэдняй інфармацыі, кіроўца “Форда”, з’язджаючы з другараднай дарогі на трасу Р-43 (мяжа РФ — Крычаў — Бабруйск — Івацэвічы), не даў перавагу грузавіку “ДАФ” з паўпрычэпам.

У выніку сутыкнення транспартных сродкаў кіроўца і пасажырка легкавога аўто памерлі ад атрыманых траўм.

Паводле інфармацыі Дзяржаўтаінспекцыі ГУУС Мінгарвыканкама, у гэты ж дзень каля 4:25 “Форд” наехаў на “карыстальніка сродку персанальнай мабільнасці”, які, паводле слоў кіроўцы аўтамабіля, перасякаў праезную частку на забараняльны сігнал святлафора. Ад атрыманых траўм 24-гадовы мужчына, які ехаў на самакаце, загінуў.

На прэс-канферэнцыі 10 верасня начальнік галоўнага ўпраўлення Дзяржаўтаінспекцыі МУС Віктар Ротчанкаў заявіў, што ДАІ прапануе прыраўняць да кіроўцаў асоб, якія перамяшчаюцца на сродках персанальнай мабільнасці. Адпаведныя папраўкі ўнесеныя ў праект указа аб унясенні змяненняў у Правілы дарожнага руху.