Да канца года ЕАБР чакае ў Беларусі інфляцыю “блізкай да цяперашніх значэнняў”
16 верасня, Позірк. У жніўні інфляцыя ў Беларусі паскорылася да 6,1% у гадавым вымярэнні пасля 5,5% ў ліпені, гаворыцца ў штотыднёвым макрааглядзе Еўразійскага банка развіцця (ЕАБР).
Як адзначаюць эксперты, “устойлівая частка інфляцыі ў жніўні (4,8% год да года) захавалася блізкай да значэнняў за чэрвень — ліпень (4,7% г/г)”.
ЕАБР чакае “захавання гадавой інфляцыі блізка да цяперашніх значэнняў да канца года на фоне праінфляцыйных рызык праз падвышаную інфляцыю ў Расіі”.
Паводле даных Белстата, спажывецкія цэны ў жніўні 2024 года знізіліся на 0,1%: харчовыя тавары патаннелі на 0,3%, нехарчовыя падаражэлі на 0,1%, паслугі — на 0,2%.
З пачатку года адбыўся рост на 3,4%: на харчовую прадукцыю цэны павялічыліся на 3,2%, нехарчовую — на 2,8%, паслугі — на 4,3%.
У гадавым выражэнні адзначана павелічэнне цэн на 6%: на харчовыя тавары — на 7,3%, нехарчовыя — на 4,4%, паслугі — на 6%.
28 сакавіка на нарадзе аб працы банкаўскай сістэмы Аляксандр Лукашэнка заявіў, што ўрад “зрабіў пэўныя захады, каб узяць пад кантроль сістэму цэнаўтварэння” і сёння “ў нейкай ступені” стрымліваць рост цэн атрымліваецца. Паводле яго слоў, ад практыкі дзяржрэгулявання цэн у Беларусі “не адступяць”.
“Сістэма кантролю за цэнаўтварэннем, за гэтым усім комплексам будзе толькі ўзмацняцца. Такая задача пастаўлена перад урадам. Я прашу мець гэта на ўвазе і Нацыянальнаму банку, і рабіць усё неабходнае, каб людзі менш на нас крыўдзіліся ў сувязі з ростам цэн, інфляцыяй у краіне”, — сказаў Лукашэнка.
На думку даследчага цэнтра BEROC, пры захаванні татальнага цэнавага кантролю спажывецкія цэны вырастуць на 5–7% па выніках 2024 года. Назапашаны інфляцыйны навес будзе паступова прасочвацца ў фактычныя цэны, і ў 2025 годзе інфляцыя можа паскорыцца да 6–9%.
Згодна з найважнейшымі прагнознымі (дэ-факта планавымі) параметрамі развіцця краіны на 2024 год, інфляцыя не павінна перавысіць 6%.
Міжнародны валютны фонд прагназуе, што рост цэн па выніках года складзе 6%, Еўразійскі банк развіцця — 8%, Еўразійскі фонд стабілізацыі і развіцця — 5,8%.
У 2023 годзе цэны выраслі на 5,8%.