Па патрабаванні гомельскай пракуратуры песні гурта Tor Band выдаленыя з прыкладання “Яндэкс Музыка”

18 верасня, Позірк. На патрабаванне пракуратуры Гомельскага раёна з прыкладання “Яндэкс Музыка” выдаленыя “экстрэмісцкія музычныя кампазіцыі” гурта Tor Band, паведамляе прэс-служба нагляднага ведамства.

Песні былі выяўленыя ў дадатку “падчас маніторынгу сеткі Інтэрнэт”, гаворыцца ў рэлізе.

Падкрэсліваецца, што ў 2022 годзе творы Tor Band былі прызнаныя “экстрэмісцкімі матэрыяламі” судом Цэнтральнага раёна Гомеля.

З сервісу таксама выдаленыя кантэнт праекта “Маланка Медыя”, і іншыя матэрыялы, адзначае пракуратура.

Акрамя гэтага, адзначаецца ў паведамленні, “у публічным доступе меліся запісы выступаў лідараў Нацыянал-сацыялістычнай рабочай партыі Германіі Адольфа Гітлера і Нацыянальнай фашысцкай партыі Італіі Беніта Мусаліні, у тым ліку з выкарыстаннем выявы названых асоб”.

Названыя запісы выдаленыя з дадатку “ў мэтах недапушчэння рэабілітацыі нацызму і процідзеяння экстрэмізму”. “Акт нагляду быў выкананы ТАА “ЯндексБел” у поўным аб’ёме”, — паведаміла ведамства.

У канцы жніўня 2022 года “экстрэмісцкімі матэрыяламі” прызнаныя “інфармацыйная прадукцыя, сацсеткі і лагатып” групы Tor Band, якая стала папулярнай дзякуючы пратэстным песням у 2020 годзе.

31 кастрычніка мінулага года Гомельскі абласны суд прыгаварыў вакаліста і гітарыста гурта Tor Band Дзмітрыя Галавача да дзевяці гадоў пазбаўлення волі ва ўмовах узмоцненага рэжыму, ударніка Яўгена Бурло — да васьмі, бас-гітарыста Андрэя Ярэмчыка — да сямі з паловай. Калегія па крымінальных справах Вярхоўнага суда адхіліла апеляцыйныя скаргі музыкаў.

Музыкаў прызналі вінаватымі паводле ч. 3 арт. 130 (распальванне расавай, нацыянальнай, рэлігійнай альбо іншай сацыяльнай варожасці або варажнечы), ч. 1 і 3 арт. 361¹ (стварэнне экстрэмісцкага фарміравання), арт. 369¹ (дыскрэдытацыя Рэспублікі Беларусь) і ч. 1 арт. 368 (абраза прэзідэнта) Крымінальнага кодэкса.

19 студзеня музыкаў унеслі ў спіс “экстрэмістаў”.