Беларускія першакурснікі польскіх ВНУ змогуць падаць дакументы на візу без папярэдняй рэгістрацыі
20 верасня, Позірк. Беларускія студэнты, якія сёлета паступілі ў ВНУ Польшчы, змогуць без папярэдняй рэгістрацыі падаць дакументы на атрыманне візы ў адпаведных цэнтрах у Мінску, Гомелі і Магілёве.
Як паведамляе візавы аператар VFS Global Group, які з’яўляецца афіцыйным партнёрам амбасады Польшчы ў Беларусі, дакументы можна будзе падаць з 23 па 27 верасня.
9 верасня паведамлялася, што заяўнікі, старэйшыя за 60 гадоў, могуць таксама падаваць дакументы на польскую візу па запрашэнні ад дзяцей і ўнукаў без папярэдняй рэгістрацыі.
У ліпені гэтага года праблемы беларускіх студэнтаў абмяркоўвалі ў Сенаце Польшчы на сустрэчы, арганізаванай віцэ-спікерам верхняй палаты парламента Міхалам Каміньскім. З дэлегацыяй студэнтаў, якія навучаюцца ў Польшчы, правялі перамовы намесніца міністра замежных спраў Ганна Радван, дырэктар стыпендыяльнай праграмы імя Кастуся Каліноўскага Ян Маліцкі.
17 верасня праблемы беларускіх студэнтаў і абітурыентаў, якія жадаюць атрымаць адукацыю ў Польшчы, абмеркавалі з прадстаўнікамі выканаўчай улады гэтай краіны намеснік кіраўніка Аб’яднанага пераходнага кабінета, кіраўнік Народнага антыкрызіснага ўпраўлення Павел Латушка і прадстаўніца АПК па нацыянальным адраджэнні Аліна Коўшык.
Сустрэча прайшла ў Міністэрстве замежных спраў Польшчы, у ёй удзельнічалі чыноўнікі Міністэрства адукацыі.
Польшча значна скараціла колькасць працоўных віз, якія выдаюцца беларусам. З пачатку 2024 года (па стане на 14 чэрвеня) Польшча выдала беларусам 32.233 працоўныя візы, годам раней — 114.598.
26 студзеня міністр замежных спраў Польшчы Радаслаў Сікорскі прыняў рашэнне прыпыніць удзел МЗС у праграме Poland Business Harbour (PBH) да прыняцця пастаноў, якія гарантуюць “належную праверку кампаній і замежнікаў, якія з’яўляюцца яе ўдзельнікамі”.
З верасня 2020 года грамадзянам Беларусі ў рамках PBH Польшча выдала 93 тыс. віз.
Візы ў краіны ЕС у Беларусі атрымаць вельмі складана. Тое ж тычыцца беларусаў-палітэмігрантаў, якія пражываюць у краінах, што не ўваходзяць у Шэнгенскую зону. Беларусы адчуваюць складанасці з запісам на падачу, консульствы не могуць працаваць аператыўна праз скарочаны штат супрацоўнікаў. Грамадзяне Беларусі часта выкарыстоўваюць паслугі пасярэднікаў або купляюць туры ў любую еўрапейскую краіну, каб атрымаць шэнгенскую візу і мець магчымасць выязджаць з краіны.
Амбасада Італіі ў жніўні паведаміла, што пры паўторным звароце будзе праводзіць “выбарачны маніторынг мэтавага выкарыстання віз”, выдадзеных беларусам: там мелі намер прасіць заяўнікаў “прадставіць сведчанні ранейшых паездак у Італію”, сярод якіх могуць быць аплачаныя квіткі і пражыванне ў Італіі з указаннем прозвішчаў і дат, імянныя чэкі на выдаткі ў Італіі (сума аднаго не менш за 50 еўра), выпіска з банкаўскага рахунку, якая адлюстроўвае выдаткі ў Італіі. Для заяўнікаў па запрашэнні грамадзян Італіі — сумесныя фатаграфіі.
У тым жа месяцы стала вядома, што каля 40 турыстаў з Беларусі, якія ехалі на аўтобусе ў Іспанію з грэцкімі шэнгенскімі візамі, затрыманыя ў Германіі. Папярэдняя прычына — парушэнне правілаў выкарыстання віз.