За перавозку мігрантаў у Польшчы затрыманая 30-гадовая беларуска

24 верасня, Позірк. У Польшчы за перавозку ў аўтамабілі чатырох нелегальных мігрантаў затрыманая 30-гадовая грамадзянка Беларусі, паведамляе Памежная ахова гэтай краіны.

Паводле звестак ведамства, аўтамабіль з варшаўскімі рэгістрацыйнымі нумарамі быў спынены для праверкі недалёка ад польска-літоўскай мяжы. У транспартным сродку, якім кіравала беларуска, былі выяўленыя грамадзяне Ірана і Афганістана, адзін з іх знаходзіўся ў багажніку.

Польскае памежнае ведамства паведамляе, што мігранты “незаконна перасеклі польска-літоўскую мяжу і не мелі неабходных дакументаў, якія даюць права на ўезд і знаходжанне на тэрыторыі Польшчы”. Замежнікі перададзеныя літоўскаму боку.

Грамадзянка Беларусі затрыманая за арганізацыю незаконнага перасячэння мяжы. У рамках узбуджанай крымінальнай справы ёй пагражае да васьмі гадоў пазбаўлення волі. Пры гэтым, як адзначаецца ў паведамленні, ёй “вынесена рашэнне аб абавязковым вяртанні ў краіну паходжання” і забароне на ўезд на тэрыторыю Польшчы і краін Шэнгенскага пагаднення на працягу 10 гадоў.

Сёлета на польска-літоўскай мяжы затрыманыя 22 чалавекі за дапамогу ў арганізацыі незаконнага перасячэння мяжы, паведамілі ў памежнай службе.

У 2,8 разы менш спробаў нелегальнай міграцыі з беларускай тэрыторыі зафіксавала Польшча за 100 дзён дзеяння буфернай зоны (з 13 чэрвеня) у параўнанні са 100 днямі, якія папярэднічалі яе ўвядзенню. Пра гэта сведчыць праведзены “Позіркам” параўнальны аналіз даных Памежнай аховы краіны.

З 13 чэрвеня па 20 верасня папярэджана 6.314 спроб супраць 17.948 з 5 сакавіка па 12 чэрвеня.