ЕБРР палепшыў прагноз па росце эканомікі Беларусі да 4,2% па выніках 2024 года

26 верасня, Позірк. Рост валавога ўнутранага прадукту Беларусі па выніках 2024 года складзе 4,2%, такі прагноз утрымліваецца ў вераснёўскім дакладзе Еўрапейскага банка рэканструкцыі і развіцця (ЕБРР) пра перспектывы рэгіянальнай эканомікі.

Адметна, што ў верасні 2023 года інвестыцыйная структура прагназавала рост беларускай эканомікі па выніках 2024-га на ўзроўні 1,3%, сёлета ў траўні — 2,8%.

Па выніках 2025 года ЕБРР прагназуе рост ВУП Беларусі на ўзроўні 2,5% (+0,3 працэнтнага пункта ў параўнанні з травеньскім прагнозам).

Пры гэтым аналітыкі падкрэслілі, што “рызыкі зніжэння прагнозу высокія”.

Рост эканомікі, гаворыцца ў дакуменце, паскорыўся да 5% у першай палове 2024 года “на фоне расце залежнасці ад расійскай эканомікі”.

“Адаптуючыся да жорсткіх санкцый, апрацоўчая прамысловасць, будаўніцтва і гандаль прадэманстравалі значнае аднаўленне, а сельская гаспадарка — упэўнены рост пасля нездавальняючых паказчыкаў папярэдняга года”, — адзначана ў дакладзе.

Паказчыкі інфармацыйна-тэлекамунікацыйных паслуг — “некалі хуткарослага флагманскага сектара” — застаюцца “нездавальняючымі ў новых умовах пасля значнага падзення за апошнія два гады”.

Экспарт і імпарт “таксама адчуваюць цяжкасці праз страту рынкаў і збояў у лагістыцы”.

ЕБРР адзначае ў цэлым стабільныя “абменны курс і валютныя рэзервы”.

“Улады працягваюць праводзіць палітыку імпартазамяшчэння і інвестуюць у альтэрнатыўныя экспартныя маршруты праз расійскія парты. Аднак гэтыя маршруты з’яўляюцца больш дарагімі, і іх поўнае развіццё зойме некалькі гадоў”, — мяркуюць аналітыкі.

Валавы ўнутраны прадукт Беларусі за студзень — жнівень 2024 года склаў 158,4 млрд рублёў, у супастаўных цэнах гэта на 4,9% больш, чым за аналагічны перыяд 2023-га, вынікае з першай ацэнкі Нацыянальнага статыстычнага камітэта. У студзені рост эканомікі склаў 2,8%, студзені — лютым — 4%, студзені — сакавіку — 4,1%, студзені — красавіку — 5,1%, студзені — траўні — 5,2%, студзені — чэрвені — 5% , студзені — ліпені — 5,5%.

Еўразійскі банк развіцця звязвае запаволенне росту валавога ўнутранага прадукту Беларусі (з 5,5% ў гадавым вымярэнні ў студзені — ліпені да 4,9 працэнта ў студзені — жніўні) з сітуацыяй у сельскагаспадарчай сферы.

Міжнародны валютны фонд чакае рост беларускай эканомікі на ўзроўні 2,4%, Сусветны банк — 1,2%, даследчы цэнтр BEROC — 4%, Еўразійскі фонд стабілізацыі і развіцця — 3,7%.

Згодна з важнейшымі прагнознымі (дэ-факта планавымі) параметрамі развіцця Беларусі на 2024 год, прырост ВУП павінен скласці 3,8%.