Ціск на мяжы з Беларуссю ўзмацняецца — міністр абароны Польшчы
26 верасня, Позірк. Сітуацыя на мяжы Польшчы з Беларуссю сур’ёзная, ціск у апошнія тыдні і дні ўзмацняецца, заявіў віцэ-прэм’ер — міністр нацыянальнай абароны Уладзіслаў Касіняк-Камыш 26 верасня на брыфінгу пасля сустрэчы з камандаваннем на польска-беларускай мяжы (Супрасльская гміна, Падляскае ваяводства), паведамляе прэс-служба польскага ўрада.
Пасля ліпеня, які быў “спакойным месяцам”, і жніўня, калі колькасць спробаў нелегальных пераходаў беларуска-польскай мяжы была не такой вялікай, верасень прынёс іх павелічэнне, сказаў міністр.
Паводле даных Касіняка-Камыша, з 1 па 26 верасня было здзейснена каля 2,5 тыс. спроб перасекчы мяжу Польшчы з боку Беларусі, а ўсяго за 2024 год — 26 тыс.
“Гэта столькі ж, колькі за ўвесь 2023 год, а да канца гэтага года засталося яшчэ больш за тры месяцы. Гэта паказвае, што гэты год значна складанейшы, ціск на мяжы і агрэсіўнасць груповак, якія спецыялізуюцца на нападах на салдат і афіцэраў, вышэйшы, чым калі-небудзь”, — сказаў міністр.
Ён згадаў аперацыю “Бяспечнае Падляшша”, у рамках якой воінскія падраздзяленні нясуць службу на мяжы з Беларуссю згодна з новымі правіламі. Паводле міністра, яна праходзіць без збояў.
Польскае войска распачало аперацыю “Бяспечнае Падляшша” 1 жніўня. У аперацыі бяруць удзел да 17 тыс. вайскоўцаў, з іх 8 тыс. знаходзяцца непасрэдна каля мяжы, астатнія — у стратэгічным рэзерве.
Польшчы неабходна выконваць міжнародныя абавязальніцтвы ў галіне правоў чалавека на мяжы з Беларуссю, такая выснова ўтрымліваецца ў заяве камісара Савета Еўропы (СЕ) па правах чалавека Майкла О’Флаэрці па выніках наведвання польскай дзяржавы 16–18 верасня.
Місія прадстаўніка СЕ была выклікана “даўнімі паведамленнямі аб інцыдэнтах на польска-беларускай мяжы”.
2 ліпеня Аляксандр Лукашэнка, выступаючы на ўрачыстым сходзе, прысвечаным Дню незалежнасці, у чарговы раз заявіў, што нелегальныя мігранты ідуць у Еўрасаюз, бо іх туды “пазвалі”, у Беларусі іх “лавіць не будуць”.
6 чэрвеня стала вядома пра смерць польскага вайскоўца 1-й танкавай брыгады Матэвуша Сітэка, параненага нажом 28 траўня на мяжы з Беларуссю. Паводле інфармацыі Памежнай аховы Польшчы, вайсковец падвергся нападу мігранта, які ў складзе вялікай групы спрабаваў незаконна перасекчы мяжу з боку Беларусі.
13 чэрвеня на польска-беларускай мяжы пачала дзейнічаць буферная зона, спачатку тэрмін быў вызначаны ў 90 дзён, 11 верасня падоўжаны яшчэ на 90 дзён.
З вясны 2021 года на мяжы Беларусі і Еўрасаюза працягваецца міграцыйны крызіс, які ўлады Польшчы і краін Балтыі называюць “гібрыднай атакай”, арганізаванай рэжымамі ў Мінску і Маскве.
За 100 дзён дзеяння буфернай зоны колькасць спробаў нелегальнай міграцыі ў Польшчу з Беларусі скарацілася ў 2,8 раза
24 верасня, Позірк. У 2,8 раза менш спробаў нелегальнай міграцыі з беларускай тэрыторыі зафіксавала Польшча за 100 дзён дзеяння буфернай зоны (з 13 чэрвеня) у параўнанні са 100 днямі, якія папярэднічалі яе ўвядзенню. Пра гэта сведчыць праведзены "Позіркам" параўнальны аналіз …