Юрысты-палітвязні атрымалі прэмію Еўрапейскай асацыяцыі крымінальных адвакатаў

29 верасня, Позірк. Палітзняволеныя беларускія адвакаты Максім Знак, Віталь Брагінец і Аляксандр Данілевіч атрымалі прэмію ў галіне правоў чалавека ім. Скота Кросбі 2024 года, паведаміла ў “Фэйсбуку” прэзідэнт Беларускай асацыяцыі адвакатаў правоў чалавека Марыя Колесава-Гудзіліна.

Узнагарода заснаваная Еўрапейскай асацыяцыяй крымінальных адвакатаў (ECBA), штогод уручаецца тым, хто праявіў “выключную мужнасць у абароне правоў чалавека і вяршэнства закону”.

Прэмія прысвечана аднаму з першых супрацоўнікаў арганізацыі, які памёр у 2020 годзе.

“Усе тры лаўрэаты знаходзяцца за кратамі ў Беларусі за сваю прафесійную дзейнасць і актыўную грамадзянскую пазіцыю. Быць адвакатам у Беларусі стала небяспечнай справай, асабліва для тых, хто адстойвае правы чалавека”, — адзначыла Колесава-Гудзіліна.

Прэмія Знаку ўручана яго сястры Ірыне Козікавай. На цырымоніі яна адзначыла, што ніякіх навін ад яе брата няма ўжо на працягу амаль двух гадоў — ён утрымліваецца ў рэжыме інкамунікада.

“Ні перапіскі, ні візітаў, ні тэлефонных званкоў, ні адваката, што адлюстроўвае трагічную рэчаіснасць для тых, хто абараняе правы чалавека ў Беларусі”, — цытуе яе ў “Фэйсбуку” адвакат Ганна Маціеўская.

Вядомы адвакат, кандыдат юрыдычных навук Максім Знак быў юрыстам штаба Віктара Бабарыкі на прэзідэнцкіх выбарах 2020 года, увайшоў у прэзідыум першага складу Кардынацыйнай рады.

6 верасня 2021 года прыгавораны паводле трох артыкулаў КК прыгаварыў да 10 гадоў пазбаўлення волі ў калоніі ва ўмовы ўзмоцненага рэжыму.

Змяшчаецца ў ВК № 3 (Віцьба, Віцебскі раён).

Віталь Брагінец — адвакат. Працаваў у юрыдычнай кансультацыі Дзяржынскага раёна Мінскай вобласці. Абараняў некаторых палітвязняў, у тым ліку кіраўніка праваабарончага цэнтру “Вясна” Алеся Бяляцкага.

Паводле чатырох артыкулаў КК прыгавораны 2 лютага 2023 года да васьмі гадоў пазбаўлення волі ў калоніі ва ўмовах узмоцненага рэжыму.

Змяшчаецца ў ВК № 17 (Шклоў, Магілёўская вобласць).

Аляксандр Данілевіч — адвакат, кандыдат юрыдычных навук. Паводле двух артыкулаў КК прыгавораны 10 красавіка мінулага года да шасці гадоў пазбаўлення волі ў калоніі ва ўмовах узмоцненага рэжыму.

Таксама змяшчаецца ў ВК № 17.

ECBA створана ў 1997 годзе.