Ціханоўская ў Варшаве возьме ўдзел у форуме па бяспецы і канферэнцыі АБСЕ
29 верасня, Позірк. Дэмакратычны лідар Святлана Ціханоўская 1–4 кастрычніка зробіць візіт у Варшаву, паведамляе яе прэс-служба.
У сталіцы Польшчы палітык возьме ўдзел у Варшаўскім форуме па бяспецы і Варшаўскай канферэнцыі АБСЕ па чалавечым вымярэнні.
Год таму яна таксама ўдзельнічала ў абодвух мерапрыемствах.
Цяпер таксама анансуецца выступ дэмлідара на 30-м сходзе ўдзельнікаў варшаўскай “Школы лідараў”.
Адзначаецца, што ў Варшаве ў беларускага палітыка запланаваны шэраг сустрэч з “міжнароднымі лідарамі”, “польскімі кіраўнікамі і афіцыйнымі асобамі”.
З інфармацыі на сайце Варшаўскага форуму па бяспецы вынікае, што сёлета ў ім возьме ўдзел 262 чалавекі. Сярод іх прэзідэнты Анджэй Дуда (Польшча), Саломэ Зурабішвілі (Грузія), прэм’ер-міністр Косава Альбін Курці, кіраўнік МЗС Украіны Андрэй Сібіга, міністры заходніх краін, парламентарыі, вайскоўцы, дыпламаты, прадстаўнікіЕС і НАТО, расійскія апазіцыянеры Міхаіл Хадаркоўскі, Міхаіл Касьянаў, Гары Каспараў.
Акрамя Ціханоўскай, Беларусь на форуме прадставіць прадстаўніца Аб’яднанага пераходнага кабінета па нацыянальным адраджэнні Аліна Коўшык.
Форум праводзіцца штогод, на ім абмяркоўваюцца пытанні міжнароднай бяспекі.
Варшаўская канферэнцыя АБСЕ па чалавечым вымярэнні — штогадовае мерапрыемства, прысвечанае пытанням правоў чалавека і асноўных свабод у рэгіёне. На канферэнцыі таксама абмяркоўваюцца актуальныя падзеі ў сферы бяспекі.
“Школа лідараў” — варшаўскі фонд, які, як паведамляецца на яго сайце, “клапоціцца пра якасць грамадскага жыцця ў Польшчы і сярод палякаў за мяжой”. “Больш за 27 гадоў мы працуем над развіццём усвядомленага, заснаванага на каштоўнасцях лідарства. Мы знаходзім і падтрымліваем лідараў у розных сферах грамадскага жыцця: у няўрадавых арганізацыях, органах мясцовага самакіравання, а таксама ў палітычных партыях і арганізацыях. Мы лічым, што менавіта людзі з лідарскімі якасцямі з’яўляюцца рухаючай сілай перамен, заахвочваючы за сабой іншых”, — гаворыцца на партале арганізацыі.
На сайце таксама пазначана, што ў сходзе “Школы лідараў” 4 кастрычніка Ціханоўская возьме ўдзел як “госць вечара”. У гэтым жа статусе прадстаўлена Аляксандра Мацвійчук — кіраўнік украінскага Цэнтра грамадзянскіх свабод, удастоенага ў 2022 годзе Нобелеўскай прэміі міру разам з беларускім праваабаронцам, палітвязнем Алесем Бяляцкім і расійскім таварыствам “Мемарыял”.