Вярхоўны суд разгледзіць апеляцыю на прыгавор па “справе аналітыкаў Ціханоўскай” (дапоўнена)

Дададзеныя 3-і і 4-ы абзацы.

29 верасня, Позірк. Вярхоўны суд 8 кастрычніка разгледзіць на закрытым пасяджэнні апеляцыйную скаргу на прыгавор па “справе аналітыкаў Ціханоўскай”, вынікае з раскладу на партале электроннага судаводства.

У раскладзе пазначана, што першай інстанцыяй па справе быў Вярхоўны суд, хоць Генеральная пракуратура 1 ліпеня паведамляла, што прыгавор вынесены Мінскім абласным судом.

Адна з асуджаных па справе, Ганна Красуліна, паведаміла “Позірку”, што пра дату разгляду апеляцыі ёй з Беларусі не паведамлялі.

“Мне ніхто не адказаў, калі я адпраўляла дакументы на апеляцыю на афіцыйны адрас [Мінскага] абласнога суда. Дзякуй за інфармацыю”, — адзначыла яна.

Фігуранты справы былі прыгавораныя да доўгіх тэрмінаў пазбаўлення волі.

Працэс праходзіў завочна, бо 20 абвінавачаных знаходзяцца за мяжой.

Старшы палітычны дарадца дэмакратычнага лідара Святланы Ціханоўскай Аляксандр Дабравольскі прыгавораны да 11,5 года пазбаўлення волі са штрафам у памеры 6.000 базавых велічынь (240 тыс. рублёў); яе прэс-сакратар Ганна Красуліна, спецпрадстаўнік па пытаннях выбараў Аляксандр Шлык, дарадца па пытаннях дыпламатыі Дзяніс Кучынскі, палітолаг, філосаф, былы акадэмічны дырэктар Інстытута стратэгічных даследаванняў BISS Пётр Рудкоўскі — да 11 гадоў пазбаўлення волі са штрафам ад 1.000 да 40.000 базавых велічынь (ад 40 тыс. да 1,6 млн рублёў); палітык Павел Усаў — да 11 гадоў пазбаўлення волі.

Да 10 гадоў пазбаўлення волі прыгавораныя дырэктар “Беларускай ініцыятывы” Chatham House Рыгор Астапеня, сацыёлаг Філіп Біканаў, аглядальнік “Радыё Свабода” Юрый Дракахруст, дырэктар інстытута “Палітычная сфера” Андрэй Казакевіч, даследчыца Вераніка Лапуцька, праграмны дырэктар “Вольнага беларускага ўніверсітэта” Аляксандр Лагвінец, журналістка Ганна Любакова, палітолагі Марыя Рогава, Кацярына Шмаціна і Алеся Руднік, эксперт праекта SYMPA/BIPART Наталля Рабава, навуковы супрацоўнік Гарадскога ўніверсітэта Манчэстэра і Вільнюскага ўніверсітэта палітолаг Таццяна Чуліцкая, Яўген Крыжаноўскі (цёзка вядомага беларускага шоўмена) і Васіль Навумаў.

Усе абвінавачаныя прызнаныя вінаватымі паводле:

ч. 6 арт. 16 і ч. 3 арт. 130 Крымінальнага кодэкса (дапамаганне ў наўмысных дзеяннях, накіраваных на ўзбуджэнне іншай сацыяльнай варожасці і варажнечы па прыкмеце іншай сацыяльнай прыналежнасці, учыненых групай асоб);

ч. 1 арт. 357 (змова, здзейсненая з мэтай захопу дзяржаўнай улады неканстытуцыйным шляхам);

ч. 6 арт. 16 і ч. 3 арт. 361 (дапамаганне ў публічных закліках да захопу дзяржаўнай улады, здзяйснення іншых дзеянняў, накіраваных на прычыненне шкоды нацыянальнай бяспецы Рэспублікі Беларусь, закліках, звернутых да замежнай дзяржавы, замежнай і міжнароднай арганізацыі, здзейсніць дзеянні, накіраваныя на прычыненне шкоды нацыянальнай бяспецы Рэспублікі Беларусь, учыненых з выкарыстаннем сродкаў масавай інфармацыі і глабальнай камп’ютарнай сеткі інтэрнэт);

ч. 3 арт. 361¹ (уваходжанне асобы ў склад экстрэмісцкага фарміравання ў мэтах здзяйснення злачынства экстрэмісцкай накіраванасці (удзел у экстрэмісцкім фарміраванні).

Дабравольскага таксама прызналі вінаватым у “кіраўніцтве экстрэмісцкім фарміраваннем і структурным падраздзяленнем, якое ў яго ўваходзіць” (ч.1 арт. 361¹ КК).

Аб заканчэнні папярэдняга расследавання крымінальнай справы “ў дачыненні да 20 удзельнікаў экстрэмісцкага фармавання “Аналітыкі Святланы Ціханоўскай” паведаміў 27 сакавіка аддзел інфармацыі і сувязі з грамадскасцю Следчага камітэта.

СК сцвярджае, што “такая структура, як і, зрэшты, усе астатнія злачынныя групоўкі збеглых радыкалаў, стваралася выключна з адной мэтай — захоп дзяржаўнай улады неканстытуцыйным шляхам”.

“З мэтай забеспячэння кампенсацыі нанесенай шкоды на маёмасць абвінавачаных, у тым ліку дарагія кватэры, дамы і зямельныя ўчасткі, накладзены арышт. У цяперашні час папярэдняе расследаванне скончана ў парадку спецыяльнай вытворчасці. Крымінальная справа перададзеная генеральнаму пракурору для накіравання ў суд”, — гаварылася ў рэлізе.

Спецвытворчасць пачалася 25 студзеня.

Спецыяльная вытворчасць — вытворчасць па крымінальнай справе ў дачыненні да абвінавачанага, які знаходзіцца па-за межамі Беларусі і ўхіляецца ад яўкі ў орган, які вядзе крымінальны працэс. Магчыма па 34 складах злачынстваў, якія пераважна адносяцца да катэгорыі цяжкіх і асабліва цяжкіх. Сярод іншага гэта акт тэрарызму, генацыд, найміцтва, здрада дзяржаве, дыверсія, стварэнне экстрэмісцкага фарміравання альбо ўдзел у ім, масавыя беспарадкі, заклікі да санкцый і інш.