Гродзенскую дыяцэзію ўзначаліў біскуп Гуляй — папа Францішак прыняў адстаўку яго папярэдніка
Біскупы Уладзімір Гуляй і Аляксандр Кашкевіч (злева направа)
30 верасня, Позірк. Папа рымскі Францішак задаволіў прашэнне біскупа Аляксандра Кашкевіча аб складанні паўнамоцтваў кіраўніка Гродзенскай дыяцэзіі, паведамляецца 30 верасня ў бюлетэні Залы друку Святога Пасаду.
На Гродзенскую кафедру прызначаны біскуп Уладзімір Гуляй, які дагэтуль займаў пасаду дапаможнага біскупа адпаведнай дыяцэзіі.
Партал Рымска-каталіцкага касцёла ў Беларусі са спасылкай на Апостальскую нунцыятуру паведаміў, што Кашкевіч падаў пантыфіку прашэнне аб адстаўцы ў сувязі з дасягненнем 75-годдзя (споўнілася 23 верасня).
Кашкевіч узначальваў Гродзенскую дыяцэзію з моманту яе стварэння 13 красавіка 1991 года. Гуляй стаў біскупам-каад’ютарам 5 красавіка 2024 года на падставе рашэння папы Францішка, у сан біскупа беларускі святар быў пасвечаны 25 траўня.
Пасля прэзідэнцкіх выбараў 2020 года стасункі дзяржавы і касцёла ў Беларусі ўскладніліся ў сувязі з тым, што многія каталіцкія іерархі і вернікі адкрыта выступілі супраць хвалі гвалту і рэпрэсій, якія рушылі ўслед за масавымі пратэстамі. Некаторыя святары прайшлі праз затрыманні, суды і арышты з палітычных матываў, асобныя былі вымушаныя пакінуць Беларусь. Рэпрэсіі ў дачыненні да прадстаўнікоў каталіцкага касцёла працягваюцца.
3 студзеня 2021 года пантыфік прыняў адстаўку мітрапаліта Мінска-Магілёўскага арцыбіскупа Тадэвуша Кандрусевіча. Фармальна гэта было звязана з тым, што беларускаму іерарху ў той дзень споўнілася 75 гадоў і ён, згодна з Кодэксам кананічнага права, быў абавязаны падаць адпаведнае прашэнне. Разам з тым, паводле неафіцыйнай інфармацыі, адстаўка Кандрусевіча была абавязковай умовай для яго вяртання ў Беларусь — рэжым Аляксандра Лукашэнкі каля чатырох месяцаў не ўпускаў арцыбіскупа ў краіну, фактычна праз пазіцыю, якую той заняў адносна грамадска-палітычнага крызісу.
Цяпер мінскую кафедру і Канферэнцыю каталіцкіх біскупаў Беларусі ўзначальвае арцыбіскуп Юзаф Станеўскі, які ў стасунках з уладамі паводзіць сябе стрымана. У сваю чаргу рэжым Лукашэнкі актыўна прыцягвае іерарха да праўладных мерапрыемстваў і імкнецца прадэманстраваць нармалізацыю стасункаў.
Каталіцызм — другая паводле колькасці паслядоўнікаў хрысціянская канфесія ў Беларусі. У краіне каля 1,5 млн католікаў, у тым ліку больш за 10 тыс. грэка-каталікоў. Рымска-каталіцкі касцёл у Беларусі прадстаўлены трыма дыяцэзіямі — Гродзенскай, Віцебскай і Пінскай, а таксама Мінска-Магілёўскай архідыяцэзіяй.