У Мінску праз тры гады адноўленая рэгістрацыя ІП

1 кастрычніка, Позірк. У Мінску з 1 кастрычніка аднаўляецца дзяржаўная рэгістрацыя індывідуальных прадпрымальнікаў. Пра гэта паведамляе прэс-служба Мінгарвыканкама.

Рэгістрацыя ІП у сталіцы была спыненая ў 2021 годзе. Улады патлумачылі гэта “тэхнічнымі прычынамі”.

22 красавіка Аляксандр Лукашэнка падпісаў закон па пытаннях прадпрымальніцкай дзейнасці. Дакумент, паводле версіі яго прэс-службы, устанаўлівае “абноўленую архітэктуру прадпрымальніцтва”, якая прадугледжвае “дзве катэгорыі, якія займаюцца прадпрымальніцкай дзейнасцю: юрыдычныя і фізічныя асобы”.

Да юрыдычных асоб аднесены малыя арганізацыі з колькасцю працуючых да 100 чалавек, сярэднія — да 250 і буйныя — звыш 250, да фізічных асоб — рамеснікі, уладальнікі аграэкасядзіб, самазанятыя, індывідуальныя прадпрымальнікі.

Віды дзейнасці, якія змогуць весці індывідуальныя прадпрымальнікі, урад вызначыў 2 ліпеня. Па відах дзейнасці, якія не ўвойдуць у плануемы пералік, з 1 кастрычніка спыняецца рэгістрацыя новых індывідуальных прадпрымальнікаў.

Таксама ўстанаўліваецца абавязак пераходу да 1 студзеня 2026 года дзейных індывідуальных прадпрымальнікаў у юрыдычныя асобы.

Дырэктар Мінскага сталічнага саюза прадпрымальнікаў і працадаўцаў Віктар Маргелаў у красавіку выказваў асцярогу, што “дзясяткі тысяч фізічных асоб у выпадку, калі ім будзе забаронена займацца пэўнымі відамі дзейнасці, могуць страціць працу”.