Ухвалены праект пагаднення з Саудаўскай Аравіяй аб паветраных зносінах

2 кастрычніка, Позірк. Аляксандр Лукашэнка 2 кастрычніка падпісаў указ, якім ухваліў праект пагаднення паміж Беларуссю і Саудаўскай Аравіяй аб паветраных зносінах, паведамляе яго прэс-служба.

У праекце вызначаюцца ўмовы ажыццяўлення палётаў, пасадкі і высадкі пасажыраў, прыняцця на борт і выгрузкі багажу, грузу і пошты пры выкананні міжнародных пасажырскіх, грузавых і паштовых перавозак.

“Рэалізацыя дакумента дасць магчымасць забяспечыць бяспеку палётаў і развіццё ўзаемавыгаднага супрацоўніцтва з Каралеўствам Саудаўская Аравія ў галіне паветраных зносін”, — гаворыцца ў рэлізе.

Перамовы наконт пагаднення будзе праводзіць Міністэрства транспарту і камунікацый.

У афіцыйнага Мінска няма дыпламатычнага прадстаўніцтва ў Саудаўскай Аравіі, за інтарэсы Беларусі ў гэтай дзяржавы адказвае пасольства ў Аб’яднаных Арабскіх Эміратах.

У пачатку ліпеня 2023 года Сяргей Алейнік, які займаў у той час пасаду міністра замежных спраў, абмеркаваў з намеснікам кіраўніка МЗС краіны Валідам аль Херыжы пытанні “актывізацыі турызму і аблягчэння візавага рэжыму” паміж краінамі. Тады Мінск выказаў намер адкрыць пасольства ў Эр-Рыядзе, але пасля ні пра які прагрэс у гэтай галіне не паведамлялася.

Дыпламатычныя адносіны паміж Беларуссю і Саудаўскай Аравіяй устаноўлены 6 чэрвеня 1997 года.

Паводле інфармацыі знешнепалітычнага ведамства, узаемны тавараабарот у 2021 годзе склаў 42,3 млн долараў (-26,4% да 2020 года), з якога на беларускі экспарт прыпала 6,1 млн. Актуальныя даныя ў адкрытым доступе адсутнічаюць.