Пашыраныя магчымасці збіваць беспілотнікі
7 кастрычніка, Позірк. Указам ад 7 кастрычніка № 392 выкладзены ў новай рэдакцыі парадак спынення палётаў авіямадэляў і беспілотных лятальных апаратаў, паведамляе прэс-служба Аляксандра Лукашэнкі.
Дакумент уносіць змены ў адпаведны ўказ ад 5 чэрвеня 2019 года № 215.
Новая рэдакцыя прынята “ў мэтах нарматыўнага замацавання права на прымяненне фізічнай сілы, спецыяльных сродкаў, зброі, баявой і спецыяльнай тэхнікі не толькі ў дачыненні да авіямадэлей і БПЛА, але і беспілотных паветраных суднаў, беспілотных транспартных сродкаў, уключаючы падводныя і надводныя судны, наземныя апараты і комплексы, кіраванне якімі ажыццяўляецца дыстанцыйным спосабам ці ў аўтаматычным рэжыме”.
У ранейшай версіі дакумента гаварылася, што “ўжываць фізічную сілу, спецыяльныя сродкі, зброю, баявую і спецыяльную тэхніку” можна “ў дачыненні да авіямадэляў і беспілотных лятальных апаратаў у мэтах спынення іх палёту шляхам прымусу да пасадкі, пашкоджання або знішчэння ў выпадках, калі такі палёт здзяйсняецца з парушэннем устаноўленага парадку ў зонах, забароненых для выкарыстання авіямадэляў, і забароненых зонах адпаведна”.
У адпаведнасці з новай версіяй указа правам на прымяненне (выкарыстанне) зброі і спецыяльных сродкаў у дачыненні да беспілотных апаратаў “разам з ваеннаслужачымі (супрацоўнікамі) воінскіх фарміраванняў і органаў унутраных спраў” (раней указ дазваляў прымяняць сілу “вайскоўцам (супрацоўнікам) воінскіх фарміраванняў і органаў унутраных” спраў, работнікам ваенізаванай аховы”. — “Позірк”.) зараз будуць надзелены таксама “супрацоўнікі (работнікі, службовыя асобы) іншых ваенізаваных арганізацый”.
Яны будуць змагацца з дронамі шляхам “прымусу да пасадкі, пашкоджання або знішчэння, уздзеяння на іх пункты (пульты) кіравання, падаўлення або пераўтварэнні сігналаў дыстанцыйнага кіравання” ў выпадках, калі гэта нясе пагрозы для ваенных, грамадзян, навакольнага асяроддзя або маёмасці.
Такія паўнамоцтвы атрымаюць: органы пракуратуры, Следчы камітэт, Дзяржаўны камітэт судовых экспертыз, органы фінансавых расследаванняў Камітэта дзяржаўнага кантролю, Дзяржаўная інспекцыя аховы жывёльнага і расліннага свету пры прэзідэнце, органы і падраздзяленні па надзвычайных сітуацыях, мытныя органы.
У новай версіі ўказа таксама зазначаецца, што яго нормы ўстаноўлены на падставе арт. 79 Канстытуцыі (“Прэзідэнт Рэспублікі Беларусь з’яўляецца кіраўніком дзяржавы, гарантам Канстытуцыі Рэспублікі Беларусь, правоў і свабод чалавека і грамадзяніна”. — “Позірк”.) і ў мэтах “забеспячэння нацыянальнай бяспекі, аховы грамадскага парадку і грамадскай бяспекі”.
У ранейшай версіі дакумента спасылкі на гэта палажэнне не было.
У ліпені, жніўні і верасні тэлеграм-канал “Беларускі Гаюн”, які спецыялізуецца на маніторынгу ваеннай сітуацыі, паведамляў аб мностве выпадкаў уварвання ў паветраную прастору Беларусі беспілотнікаў, якімі Расія атакуе Украіну.
У ноч на 3 кастрычніка на тэрыторыю Беларусі ў чарговы раз заляцеў расійскі БПЛА, робат іранскай маркі “Шахед” упаў у Калінкавічах (Гомельская вобласць).
4 кастрычніка Аляксандр Лукашэнка прызнаў факты парушэння мяжы Беларусі баявымі беспілотнікамі і заявіў, што беларускі бок “шмат” збівае, не гледзячы на тое, украінскія яны ці расійскія.
Залёт БПЛА Лукашэнка патлумачыў нявопытнасцю тых, хто іх выкарыстоўвае, і адзначыў, што пасля ўздзеяння сродкаў радыёэлектроннай барацьбы беспілотнікі губляюць арыенцір.
Выкарыстанне беспілотнікаў фізічнымі асобамі ў Беларусі забаронена.
У Ваеннай акадэміі хочуць стварыць кафедру падрыхтоўкі аператараў БПЛА
7 кастрычніка, Позірк. Падрыхтоўку аператараў беспілотных лятальных апаратаў (БПЛА), у тым ліку стварэнне спецыялізаванай кафедры ў Ваеннай акадэміі Беларусі, абмеркавалі 7 кастрычніка на арганізаванай Мінабароны нарадзе з рэктарамі ўстаноў вышэйшай адукацыі, паведамляе ведамства. Падрыхтоўка аператараў БПЛА запушчана ў праўладным ДТСААФ, …