Ва Украіне раскрытая схема вывазу людзей у акупаваны Данецк праз Беларусь

11 кастрычніка, Позірк. Схема незаконнага вывазу людзей з Украіны ў акупаваны Расіяй Данецк раскрытая праваахоўнымі органамі, паведамляе прэс-служба пракуратуры Кіева.

Сцвярджаецца, што злачынная група ажыццяўляла нелегальныя пасажырскія перавозкі з Кіева праз тэрыторыю Польшчы, Беларусі і Расіі.

У групу ўваходзілі жыхары Данецкай вобласці, якія дзейнічалі “разам з саўдзельнікамі”, гаворыцца ў паведамленні.

“Схема працавала праз закрытую групу ў месенджары, дзе размяшчаліся аб’явы аб рэйсах. Пасажыры спачатку выязджалі ў Польшчу, адтуль накіроўваліся ў Беларусь, затым авіярэйсам “Мінск — Масква” траплялі ў Расію, а адтуль аўтобусам — у Данецк. Кошт такой “паслугі” складаў 350–400 еўра”, — адзначае кіеўская пракуратура.

“Арганізатару схемы і яго саўдзельніцы, жыхарам Данецкай вобласці”, выстаўленае падазрэнне ва ўчыненні крымінальнага злачынства, яны змешчаныя пад хатні арышт.

Паведамляецца, што падазраваным пагражае ад 7 да 9 гадоў пазбаўлення волі з канфіскацыяй маёмасці і забаронай займацца пэўнай дзейнасцю да трох гадоў.

Паводле звестак нагляднага ведамства, пасля расійскага ваеннага ўварвання ва Украіне раскрыта больш за 600 груп, якія займаліся незаконнай перапраўкай людзей праз мяжу.