Палітолага Суздальцава будуць судзіць у Маскве за “крытыку Лукашэнкі”
13 кастрычніка, Позірк. Лефортаўскі суд Масквы 15 кастрычніка пачне разгляд крымінальнай справы ў дачыненні да палітолага, публіцыста Андрэя Суздальцава.
З раскладу пасяджэнняў на адпаведным інтэрнэт-партале вынікае, што справа ўзбуджаная паводле ч. 1 і ч. 2 арт. 128.1 Крымінальнага кодэкса РФ (паклёп).
Максімальнае пакаранне паводле гэтага артыкула — пяць гадоў пазбаўлення волі, мінімальнае — грашовы штраф.
Грамадскі дзеяч Раман Юнэман сцвярджае ў сваім тэлеграм-канале, што Суздальцава будуць судзіць “за крытыку [Аляксандра] Лукашэнкі з прарасійскіх пазіцый”.
“Андрэй Іванавіч 13 гадоў працаваў у Беларусі, — напісаў Юнэман. — Ён адзін з найлепшых у РФ экспертаў у гэтай краіне. І ўжо даўно вядомы як паслядоўны крытык рэжыму Аляксандра Лукашэнкі. Прычым выключна з прарасійскіх пазіцый: ён цалкам справядліва лічыць, што РБ толькі імітуе інтэграцыю і стварэнне Саюзнай дзяржавы, бясконца зацягвае працэс, а на міжнародным узроўні беларускія ўлады праводзяць хітрую шматвектарную палітыку, атрымліваючы пры гэтым ад Расіі велізарныя льготы і зніжкі”.
Паводле слоў Юнэмана, справа ў дачыненні да 63-гадовага Суздальцава распачатая паводле пазову амбасады Беларусі ў Расіі.
11 студзеня гэтага года Міністэрства ўнутраных спраў Беларусі прызнала “экстрэмісцкім фарміраваннем” групу грамадзян, “аб’яднаных пад агульнай назвай і кіраўніцтвам грамадзяніна Расіі Суздальцава А.І.”.
Адзначалася, што “фарміраванне” пад назвай “Андрэй Суздальцаў” вядзе “экстрэмісцкую дзейнасць як на тэрыторыі Расіі, так і Беларусі”.
Асацыяваным з гэтым “экстрэмісцкім фарміраваннем” рэсурсам у пераліку пазначаны тэлеграм-канал Суздальцава (не абнаўляецца з чэрвеня, колькасць падпісчыкаў цяпер 3,7 тыс.).
Суздальцаў — прыхільнік ідэалогіі “рускага свету”, падтрымлівае расійскую агрэсію ва Украіне, шматгадовы крытык Лукашэнкі і яго палітыкі.
У 2006 годзе ўлады з прычыны “пагрозы нацыянальнай бяспецы” пазбавілі яго віду на жыхарства ў Беларусі, дэпартавалі і забаранілі ўезд у краіну на 5 гадоў. Цяпер працуе ў Нацыянальным даследчым універсітэце “Вышэйшая школа эканомікі” (РФ).
Улетку мінулага года кантэнт яго тэлеграм-канала быў прызнаны ў Беларусі “экстрэмісцкімі матэрыяламі”.