Ціханоўская: Захад не павінен закрывацца ад беларусаў — ні фізічна, ні ментальна
14 кастрычніка, Позірк. “Захад не павінен закрывацца ад беларусаў — ні фізічна, ні ментальна, наадварот, неабходна зрабіць усё магчымае, каб вярнуць іх у Еўропу, дзе ім самае месца”, — заявіла дэмакратычны лідар Святлана Ціханоўская, выступаючы 14 кастрычніка ў Берліне на форуме “Будучыня Беларусі”.
Паводле слоў Ціханоўскай, якую цытуе яе прэс-служба, “пакуль дыктатараў ізалююць і караюць санкцыямі, народ Беларусі, які працягвае змагацца за сваю свабоду, павінен атрымліваць падтрымку”.
Палітык адзначыла неабходнасць падтрымкі “сувязяў паміж людзьмі”, дадаўшы, што “маладым беларусам павінны выдавацца бясплатныя візы і стыпендыі, падтрымку павінны атрымліваць незалежныя дзеячы мастацтва і непадцэнзурныя СМІ”.
Ціханоўская заклікала міжнародную супольнасць “змяніць погляд на Беларусь” і разглядаць краіну “не як пагрозу, а як магчымасць”. “Змены ў Беларусі могуць выклікаць змены ў Расіі і кінуць выклік тыраніям ва ўсім свеце”, — падкрэсліла яна.
“Мы павінны разглядаць Беларусь не проста як рэжым, а як краіну глыбока еўрапейскіх людзей. У адрозненне ад Расіі ў Беларусі ёсць дакументальна пацверджаная дэмакратычная большасць. Выбар на карысць Еўропы быў зроблены не дзеля кароткатэрміновых выгад, а праз гісторыю, культуру і ідэнтычнасць Беларусі”, — сказала дэмлідар.
Паводле яе слоў, “беларусы не падзяляюць расійскі імперскі менталітэт”, “адпрэчваюць вайну Расіі ва Украіне і не хочуць быць часткай “рускага свету”. “Нягледзячы на тое, што мы жывем пад тэрорам і прапагандай, мы не здаліся — мы працягваем супраціўляцца”, — дадала Ціханоўская.
Без свабоднай Беларусі і свабоднай Украіны “еўрапейскі праект не будзе завершаны”, перакананая яна, толькі дэмакратычная Беларусь “можа быць донарам стабільнасці і міру ў Еўропе, а не яе пастаяннай пагрозай”.
“Калі вы жывяце ў дэмакратыі, гэта як паветра: калі яго губляеш, пачынаеш задыхацца. У адных краінах людзі прымаюць гэта як належнае, у іншых — за свабоду плацяць жыццём. Вось чаму так важна падтрымліваць Беларусь, стаяць на баку Украіны і абараняць дэмакратыю”, — падкрэсліла палітык.
Ціханоўская здзяйсняе візіт у Берлін 14–15 кастрычніка. У працы форуму “Будучыня Беларусі”, акрамя яе, бяруць удзел намеснік кіраўніка Аб’яднанага пераходнага кабінета (АПК), кіраўнік Народнага антыкрызіснага ўпраўлення (НАУ) Павел Латушка, прадстаўнік АПК па міжнародным і еўрапейскім супрацоўніцтве Уладзімір Астапенка, прадстаўнік па нацыянальным адраджэнні Аліна Коўшык, кіраўнік апарата кабінета Валерый Мацкевіч.
Як паведамілі “Позірку” ў прэс-службе Латушкі, акрамя ўдзелу ў форуме, палітык плануе сустрэчы з міністрам замежных спраў Германіі Аналенай Бербак, кіраўніком Мінюста гэтай краіны Марка Бушманам, віцэ-канцлерам, міністрам эканомікі і барацьбы са зменай клімату Робертам Хабекам, віцэ-прэзідэнтам Бундэстага Івонай Магвас, старшынёй камітэта па справах ЕС у Бундэстагу Антонам Хофрайтэрам, парламента ад Партыі зялёных, ініцыятарам стварэння міжфракцыйнай групы “За дэмакратычную Беларусь” Робінам Вагенерам.
НАУ, як паведамляецца, правядзе кансультацыі з Міністэрствам юстыцыі Германіі па пытаннях “адказнасці рэжыму Лукашэнкі за ўчыненыя злачынствы”, “дэпартацыі ў Беларусь украінскіх дзяцей”, “спынення арыштаў і экстрадыцыі беларусаў па запытах Інтэрпола”.