Прарасійская партыя перамагла на ўчастку ў літоўскай амбасадзе ў Мінску

Апублікавана на адкрытай версіі “Позірку” 15 кастрычніка 2024 года ў 11:19

14 кастрычніка, Позірк. Прарасійская Літоўская народная партыя (ЛНП) перамагла на ўчастку ў амбасадзе Літвы ў Мінску ў першым туры выбараў у нацыянальны парламент 13 кастрычніка, сведчыць праведзены “Позіркам” аналіз звестак Галоўнай выбарчай камісіі Літвы.

ЛНП атрымала 25,71% галасоў (9 з 35). Агулам партыя не пераадолела 5-працэнтны бар’ер і не трапіла ў парламент (2,64% і 10-е месца).

Як адзначала напярэдадні выбараў Літоўская тэлерадыёкампанія, ЛНП фігуравала ў справе мясцовага палітыка Альгірдаса Палецкіса, асуджанага за шпіянаж на карысць Расіі. Яна “згадвалася як структура, якая спрабавала атрымаць фінансаванне з Расіі”.

Пераможца першага тура — апазіцыйная Літоўская сацыял-дэмакратычная партыя (19,36%) — у Мінску атрымала адзін голас (2,86%) і заняла восьмае месца.

Яўка склала 72,92% (было зарэгістравана 48 выбаршчыкаў, 5 прагаласавала па пошце; 1 бюлетэнь прызнаны несапраўдным) пры агульнай яўцы ў замежнай акрузе 56% і агулам — 52,06% (датэрмінова прагаласавала 11,75% выбаршчыкаў).

Парламенцкія выбары ў Літве адбываюцца паводле змяшанай сістэмы: 70 месцаў размяркоўваецца паміж партыямі, 71 — паміж аднамандатнікамі.

У замежнай акрузе 27 кастрычніка пройдзе другі тур, куды выйшлі прадстаўнікі ўладнай кааліцыі Даля Асанавічутэ (Саюз Айчыны — Літоўскія хрысціянскія дэмакраты) і міністр эканомікі і інавацый Аўшрыне Арманайтэ (Партыя свабоды) — 29,43% і 29,17% адпаведна. У Мінску на першым месцы Арманайтэ (22,86%; 8 галасоў), у Асанавічутэ чацвёрты вынік сярод 11 кандыдатаў (8,57%; 3 галасы). З 35 бюлетэняў несапраўднымі былі прызнаныя два. 6 чалавек галасавала па пошце.

Гл. таксама:

Улады Беларусі загаварылі пра жаданне аднавіць супрацу з Літвой

У кастрычніку амбасады Літвы, Малдовы і Грузіі ў Мінску арганізуюць выбарчыя ўчасткі ў рамках нацыянальных электаральных кампаній