Намеснік кіраўніка МУС Польшчы: Беларусь можа паспрабаваць сілай дэстабілізаваць абстаноўку на мяжы
15 кастрычніка, Позірк. Ідэя прыпыніць права на прытулак узнікла “ў некалькіх чалавек” у асяроддзі польскага кіраўніцтва “некалькі тыдняў таму падчас вялікай размовы” невыпадкова, стаўшы адказам на “канкрэтныя падзеі”, заявіў у эфіры TVN 24 15 кастрычніка намеснік міністра ўнутраных спраў і адміністрацыі Польшчы Мацей Душчык .
Паводле яго, польскі бок атрымаў інфармацыю аб “розных сцэнарах, якія ствараюцца ў Расіі і Беларусі”.
“Беларусам не падабаецца, што граніца становіцца ўсё больш непранікальнай, што яны прайграюць у гэтым супрацьстаянні, што перастаюць зарабляць на гэтым грошы, таму што кантрабандысты ўсё радзей рэкламуюць гэты міграцыйны маршрут, бо бар’ер на граніцы становіцца ўсё больш надзейным”, — сказаў намеснік міністра.
Паводле аднаго са сцэнароў, сцвярджае ён, можа быць зроблена сілавая спроба дэстабілізаваць сітуацыю на мяжы.
Павінны быць дадзены “юрыдычныя гарантыі для рэалізацыі нават негатыўных сцэнарыяў, каб усе службы, якія знаходзяцца на мяжы, ведалі, як дзейнічаць”, дадаў Душык.
Ён адзначыў, што “нават атакуючыя польскіх пагранічнікаў мігранты маю права запытаць прыстанішча”, “дзяржава ў такой сітуацыі бездапаможная, таму што Жэнеўская канвенцыя не прадугледжвае такіх выпадкаў”.
“Калі мы атрымліваем інфармацыю пра тое, што Беларусь <…> прывозіць, напрыклад, людзей з Сірыі, і мы ведаем, што, напрыклад, гэта зняволеныя, якія вызваленыя з сірыйскіх турмаў <…>, і яны пачынаюць збірацца на польскай мяжы — мы павінны часова і тэрытарыяльна прыпыніць права на прытулак. Таму што яно можа быць выкарыстанае для ўзмацнення таго эфекту, якога хоча дабіцца Лукашэнка”, — патлумачыў намеснік кіраўніка МУС.
“Лукашэнка і Пуцін не могуць вырашаць пытанні прадастаўлення прыстанішча, гэта павінны вырашаць мы”, — сказаў ён.
На з’ездзе кіруючай “Грамадзянскай кааліцыі” 12 кастрычніка прэм’ер-міністр Польшчы Дональд Туск, які яе ўзначальвае, абвясціў, што 15 кастрычніка прадставіць на пасяджэнні ўрада новую міграцыйную стратэгію, якая сярод іншага прадугледжвае “часовае тэрытарыяльнае прыпыненне права на прытулак”.
Туск паабяцаў, што ўрад “звядзе нелегальную міграцыю да мінімуму”. “Дзяржава павінна сачыць за тым, каб у Польшчу прыязджалі людзі, якія хочуць шчыра працаваць у Польшчы, плаціць падаткі, інтэгравацца ў польскае грамадства, вучыцца ў рэальнай ВНУ. Менавіта гэтыя людзі заслугоўваюць павагі”, – сказаў прэм’ер.
Пасля падзеяў 2020 года ў Беларусі Польшча стала адной з ключавых краін, у якія шмат беларусаў уцякло ад рэпрэсій рэжыму Аляксандра Лукашэнкі.
Права на прытулак павінна спыняцца толькі ў надзвычайнай сітуацыі — спікер Сейма Польшчы
15 кастрычніка, Позірк. Права на прытулак варта было б прыпыняць толькі пры ўзнікненні якой-небудзь апісанай у Канстытуцыі сітуацыі — надзвычайнага, ваеннага становішча, такое меркаванне выказаў спікер польскага Сейма, лідар партыі "Польшча 2050" Шымон Галоўня. "Прыпыненне права на прытулак павінна адбывацца толькі ў …