Польшча створыць спецпадраздзяленне для “фізічнай аховы мяжы”
17 кастрычніка, Позірк. Пра намер стварыць спецыяльнае падраздзяленне ў структуры Памежнай аховы Польшчы заявіў на прэс-канферэнцыі 17 кастрычніка міністр унутраных спраў і адміністрацыі гэтай краіны Томаш Семоняк.
Прэс-канферэнцыя прайшла ў Няміраве (Падляскае ваяводства), паведамляе tvp.info.
Паводле слоў Семоняка, новае спецпадраздзяленне будзе займацца “фізічнай, непасрэднай аховай межаў”.
Польшча, падкрэсліў міністр, павінна “аднавіць кантроль над тым, хто заязджае і выязджае з краіны”.
“Кожны дзень мы сутыкаемся са спробамі [нелегальнага] перасячэння мяжы, — сказаў ён. — Верасень быў горшым месяцам [у гэтым сэнсе]. Гэтая тэндэнцыя пагоршылася. Аднак мы лічым, што інвестыцыі, укладзеныя ў загароду [на мяжы з Беларуссю], прыносяць вынікі”.
Ён таксама адзначыў “выдатнае супрацоўніцтва” паміж МУС і Міністэрствам абароны ў пытаннях нелегальнай міграцыі, назваўшы яго “ўзорным”.
Семоняк заявіў, што цалкам падтрымлівае тэрмін армейскага генерала Аркадзіюша Шкутніка: Mission — one team (“Адна мэта, адна каманда”).
“Камандзіры і шэраговыя салдаты працуюць рука аб руку з памежнікамі і супрацоўнікамі паліцыі. Камандзіры і каменданты робяць усё, каб польская дзяржава дзейнічала тут як адзін кулак”, — сцвярджае кіраўнік МУС.
15 кастрычніка прэм’ер-міністр Польшчы Дональд Туск паведаміў, што ў Польшчы прынятая комплексная міграцыйная стратэгія “Вярніце сабе кантроль. Забяспечыць бяспеку”. Раней ён заяўляў, што гэтая стратэгія прадугледжвае “часовае тэрытарыяльнае прыпыненне права на прытулак”.
16 кастрычніка ў інтэрв’ю Gazeta Wyborcza Туск заявіў, што права на прытулак павінна прадастаўляцца толькі тым людзям, якія “сапраўды падвяргаецца пераследам у сваёй краіне, і вяртанне туды пагражае іх жыццю”.
Ён падкрэсліў, што прыпыненне прыёму заяў на прытулак будзе тычыцца “асоб, якія незаконна перасякаюць польскую мяжу пры падтрымцы беларускіх і расійскіх службаў”.
Журналіст пры гэтым прывёў сведчанне сваёй “сяброўкі з Беларусі”, якая падала прашэнне аб атрыманні з Польшчы міжнароднай абароны — і цяпер, у святле заяў прэм’ера аб узмацненні жорсткасці міграцыйнай палітыкі, асцерагаецца дэпартацыі.
“Калі яна падала заяву аб прадастаўленні прытулку, яна будзе разгледжаная”, — адказаў на гэта прэм’ер-міністр.
У той жа дзень, рэагуючы на крытыку з боку прэзідэнта Польшчы Анджэя Дуды, Туск падкрэсліў, што “не было ніводнага выпадку, каб беларускі апазіцыянер спрабаваў нелегальна перасекчы польска-беларускую мяжу ў складзе груп, арганізаваных Лукашэнкам”.
“Сітуацыя на мяжы такая, што арганізаваныя групы, часам падрыхтаваныя беларускімі службамі, за кошт расійскіх і беларускіх грошай і сродкаў кантрабандыстаў дастаўляюцца самалётамі ў Маскву і Мінск. Там стаяць аўтобусы, гэтых людзей прывозяць да мяжы, часам рыхтуюць месяцамі, каб яны нелегальна яе перасеклі і правакавалі канфлікты на нашай мяжы”, — растлумачыў прэм’ер-міністр.
Рашэнні ўрада накіраваныя не толькі на абарону мяжы з Беларуссю, але і на прадухіленне гібелі людзей, як з боку мігрантаў, так і з боку польскіх салдат і памежнікаў, сцвярджае ён.
14 кастрычніка прэс-сакратарк Еўракамісіі Аніта Хіпер падкрэсліла, што Еўрасаюзу “важна і неабходна абараняць свае вонкавыя межы”, аднак дзяржавы — члены ЕС маюць міжнародныя абавязанні, уключаючы доступ да працэдуры надання прытулку.
Паводле яе слоў, пытанні аховы межаў і абавязкі прадастаўляць прытулак замежнікам “не з’яўляюцца ўзаемавыключальнымі”.
Пасля падзей 2020 года ў Беларусі Польшча стала адной з ключавых краін, у якія мноства беларусаў бегла ад рэпрэсій рэжыму Аляксандра Лукашэнкі.