Яшчэ адзін беларус асцерагаецца дэпартацыі з Балгарыі — яму адмовілі ў атрыманні статусу бежанца
17 кастрычніка, Позірк. Улады Балгарыі адмовілі грамадзяніну Беларусі Барысу Барысаву ў наданні статусу ўцекача, цяпер мужчына асцерагаецца дэпартацыі на радзіму, паведамляе Балканская сетка журналісцкіх расследаванняў BIRN.
Паводле слоў Барысава, у выпадку вяртання ў Беларусь ён можа падвергнуцца палітычнаму пераследу.
“Закрытае расследаванне майго ўдзелу ў пратэстах 2020 года будзе праведзенае неадкладна. Мая актыўнасць у сацыяльных сетках і той факт, што ў мяне былі кантакты з іншымі актывістамі за мяжой, таксама будуць праблемнымі фактарамі”, — сказаў ён.
Апавяшчэнне аб адмове ад Дзяржаўнага агенцтва па справах уцекачоў Балгарыі беларус атрымаў 7 кастрычніка. “Яго заявы аб тым, што ён пакінуў Беларусь праз боязь пераследу, не могуць быць пацверджаныя ніякім чынам і з’яўляюцца беспадстаўнымі”, — гаворыцца ў паведамленні.
15 кастрычніка ён абскардзіў рашэнне.
Паведамляецца, што ў Балгарыі Барысаў пражывае з 2023 года разам з сям’ёй — жонкай і пяцігадовым сынам. У гэтую краіну мужчына пераехаў з Грузіі. Беларусь ён пакінуў у лютым 2022-га.
Паводле слоў Барысава, у 2020 годзе ён уваходзіў у каманду прэтэндэнта на пасаду прэзідэнта Віктара Бабарыкі — аказваў фінансавую падтрымку дэмакратычнаму руху, арганізоўваў мірныя мітынгі, збіраў подпісы падчас кампаніі.
Цяпер у яго скончыўся тэрмін дзеяння беларускага пашпарта.
25 верасня паведамлялася, што ўлады Балгарыі адмовілі ў прадастаўленні прытулку грамадзяніну Беларусі Андрэю, прозвішча не называлася з меркаванняў бяспекі сваякоў, якія знаходзяцца ў Беларусі.
Паводле інфармацыі BIRN, у атрыманні прытулку беларусу адмовіў 17 верасня Вярхоўны суд у Сафіі, ён з адвакатамі меў намер абскардзіць рашэнне і не выключаў звароту ў Еўрапейскі суд па правах чалавека.
Адзначалася, што Андрэй знаходзіцца ў шлюбе з расійскім журналістам і апазіцыйным актывістам Аляксеем Бачынскім, які атрымаў прытулак у Балгарыі 25 красавіка. Шлюб быў аформлены ў Капенгагене ў 2014 годзе.
Пара пераехала ў Балгарыю з Расіі ў 2022 годзе пасля вайсковага ўварвання РФ ва Украіну. Выданне паведамляе, што яны “ўдзельнічалі ў актывізме супраць рэжымаў у Расіі і Беларусі і падтрымлівалі праўкраінскія дэманстрацыі ў Расіі, Беларусі і Балгарыі”.
У цяперашні час у Сербіі пад хатнім арыштам знаходзіцца затрыманы па прылёце ў гэтую краіну 30 кастрычніка мінулага года рэжысёр тэлерэкламы і музычных кліпаў, журналіст і сузаснавальнік прызнанага ў Беларусі “экстрэмісцкім фарміраваннем” аб’яднання SOS.by Андрэй Гнёт. Яго затрымалі па лініі Інтэрпола па запыце беларускіх уладаў. Мужчына праз суд дамагаецца адмены рашэння аб выдачы яго ў Беларусь.