Сястра Калеснікавай: Наша сям’я вітае гатоўнасць разгледзець заяву аб памілаванні

Апублікавана на адкрытай версіі “Позірку” 24 кастрычніка 2024 года ў 13:04

24 кастрычніка, Позірк. “Машы трэба ратаваць сваё жыццё, ёй трэба выходзіць на волю і папраўляць здароўе. Наша сям’я вітае гатоўнасць разгледзець яе заяву аб памілаванні, мы вельмі чакаем яе на волі”, — так пракаментавала “Позірку” заяву Аляксандра Лукашэнкі аб гатоўнасці разгледзець прашэнне Марыі Калеснікавай аб памілаванні яе сястра Таццяна Хоміч.

“Я ўпэўненая, — сказала Хоміч, — што Марыя можа разглядаць розныя варыянты, але ва ўладаў ёсць доступ і магчымасці для таго, каб гэта даведацца. Але і, вядома, трэба аднаўляць сувязь з сям’ёй, каб яна разумела, што адбываецца”.

Паводле слоў сястры, у Калеснікавай дагэтуль няма сувязі са сваякамі і адвакатам. “Ды і адваката як такога няма”, — адзначыла Хоміч.

Пра гатоўнасць разгледзець прашэнне палітзняволенай Калеснікавай Лукашэнка заявіў у інтэрв’ю BBC 23 кастрычніка ў Казані, куды ён прыбыў для ўдзелу ў саміце БРІКС.

Журналіст BBC Стыў Розенберг спытаў, чаму ў Калеснікавай ужо доўгі час “няма допуску да сям’і”. “Якой сям’і? — заявіў Лукашэнка. — А дзе яе сям’я, вы хоць ведаеце? Вы нават не ведаеце, што за сям’я. Папрасіў бацька яе наведаць. Калі ласка, ідзі. Ён быў. Гэта сям’я? Хтосьці яшчэ хоча з родных, блізкіх наведаць яе, будзе просьба — мы яе разгледзім”.

“Там, магчыма, такая сям’я, што ім, можа, і нецікава, як вам, наведаць Марыю Калеснікаву. Вы дбаеце за яе больш, чым родныя і блізкія. Таму калі нават вы звернецеся, мы вашую заяву разгледзім. Я кажу: разгледзім. “Так”,” не “— гэта будзе бачна потым”, — сказаў Лукашэнка.

“Магчыма, мелася на ўвазе спатканне Марыі з татам, якое было яшчэ ў снежні 2022 года адразу пасля аперацыі. Гэта спатканне доўжылася 10 хвілін у медчастцы калоніі”, — патлумачыла “Позірку” Таццяна Хоміч.

Асуджаная 6 верасня 2021 года на 11 гадоў пазбаўлення волі Марыя Калеснікава была спікерам і кіраўніком выбарчага штаба былога старшыні праўлення “Белгазпрамбанка” Віктара Бабарыкі на прэзідэнцкіх выбарах 2020 года. Пасля затрымання экс-банкіра далучылася да каманды Святланы Ціханоўскай і стала адной з прадстаўніц Аб’яднанага штаба разам з Веранікай Цапкала, жонкай яшчэ аднаго прэтэндэнта на пасаду прэзідэнта Валера Цапкалы.

У лістападзе 2022 года Калеснікаву экстранна прааперавалі ў Гомельскай гарадской клінічнай бальніцы хуткай медыцынскай дапамогі, куды яе даставілі ў цяжкім стане. У палітзняволенай дыягнаставалі перытаніт (запаленне брушыны), які стаў ускладненнем прабадной язвы.

З-за інфармацыйнай блакады, якую чыніць адміністрацыя калоніі, інфармацыі пра яе стан практычна няма.

Гл. таксама інтэрв’ю Таццяны Хоміч “Позірку”:

“…Ёй казалі: на вас усе забыліся”. Чатыры гады таму была пазбаўленая волі Марыя Калеснікава