Лукашэнка заявіў пра гатоўнасць разгледзець прашэнне Калеснікавай аб памілаванні
23 кастрычніка, Позірк. Пра гатоўнасць разгледзець прашэнне палітзняволенай Марыі Калеснікавай аб памілаванні заявіў у інтэрв’ю BBC 23 кастрычніка Аляксандр Лукашэнка.
Інтэрв’ю адбылося ў Казані на палях саміту БРІКС, паведаміла прэс-служба Лукашэнкі
“У нас ёсць закон: чалавек усвядоміў сваю віну, ён звярнуўся да прэзідэнта (як і ў многіх іншых краінах) з просьбай аб памілаванні — ну што ж, мы разгледзім. Калі будзе такі зварот Калеснікавай, я абавязкова разгледжу”, — цытуюць Лукашэнку дзяржаўныя СМІ.
Журналіст BBC Стыў Розенберг спытаў у суразмоўцы, чаму ў Калеснікавай ужо доўгі час “няма допуску да сям’і”.
“Якой сям’і? — заявіў Лукашэнка. — А дзе яе сям’я, вы хоць ведаеце? Вы нават не ведаеце, што за сям’я. Папрасіў бацька яе наведаць. Калі ласка, ідзі. Ён быў. Гэта сям’я? Хтосьці яшчэ хоча з родных, блізкіх наведаць яе, будзе просьба — мы яе разгледзім”.
“Там, магчыма, такая сям’я, што ім, можа, і нецікава, як вам, наведаць Марыю Калеснікаву. Вы дбаеце за яе больш за родных і блізкіх. Таму калі нават вы звернецеся, мы вашую заяву разгледзім. Я кажу: разгледзім. “Так”, “не “— гэта будзе бачна потым”, — дадаў Лукашэнка.
Паводле яго сцвярджэння, у беларускіх месцах зняволення “ўсе людзі аднолькавыя”. “А Калеснікава і іншыя павінны адказаць перад гэтымі людзьмі, чаму яны там апынуліся”, — сказаў Лукашэнка.
Асуджаная 6 верасня 2021 года на 11 гадоў пазбаўлення волі Марыя Калеснікава была спікерам і кіраўніком выбарчага штаба былога старшыні праўлення “Белгазпрамбанка” Віктара Бабарыкі на прэзідэнцкіх выбарах 2020 года. Пасля затрымання экс-банкіра далучылася да каманды Святланы Ціханоўскай і стала адной з прадстаўніц Аб’яднанага штаба разам з Веранікай Цапкала, жонкай яшчэ аднаго прэтэндэнта на пасаду прэзідэнта Валера Цапкалы.
У лістападзе 2022 года Калеснікаву экстранна прааперавалі ў Гомельскай гарадской клінічнай бальніцы хуткай медыцынскай дапамогі, куды яе даставілі ў цяжкім стане. У палітзняволенай дыягнаставалі перытаніт (запаленне брушыны), які стаў ускладненнем прабадной язвы.
З-за інфармацыйнай блакады, якую чыніць адміністрацыя калоніі, інфармацыі пра яе стан практычна няма.
11 красавіка заснавальніца ініцыятывы “Палітвязынка” Яўгенія Доўгая паведаміла, што палітзняволеная адчувае “моцныя праблемы са здароўем, у тым ліку высокі ціск”. Паводле яе інфармацыі, Калеснікавай “не надаюць неабходную медыцынскую дапамогу”.
У ліпені Камітэт ААН па ліквідацыі дыскрымінацыі жанчын запатрабаваў спыніць утрыманне Калеснікавай без сувязі са знешнім светам і заклікаў беларускія ўлады “неадкладна даць доступ да адваката і аднавіць зносіны Марыі са сваякамі”.
Паводле слоў беларускага дэмакратычнага лідара Святланы Ціханоўскай, Марыя Калеснікава — адзіная жанчына-палітзняволеная, якая знаходзіцца ў рэжыме інкамунікада — без сувязі з роднымі і знешнім светам. Акрамя яе ў такіх жа ўмовах трымаюць Сяргея Ціханоўскага, Мікалая Статкевіча, Максіма Знака, Віктара Бабарыкі і Уладзіміра Кнігу.
2 верасня сястра палітзняволенай Таццяна Хоміч паведаміла (https://aianalyticsweb.com/be/news/103038/), што Калеснікава пры росце 175 см важыць 45 кг, з прычыны хваробы яна “не можа есці шмат чаго з турэмнага меню” і “фактычна галадае”. “Карміць язвеніка баландай — гэта катаваць яго і павольна забіваць, — напісала сястра палітзняволенай. — Не даваць чалавеку права на перапіску з сям’ёй — паскараць гэтую смерць. Маша не ведае, ці жывы тата і як ён пачуваецца. Мы не ведаем, як яе кормяць і лечаць”.
Сваякі не атрымліваюць лістоў ад палізняволенай з лютага 2023 года. У апублікаваным 14 кастрычніка артыкуле агенцтва Associated Press адзначалася, што яе бацька Аляксандр Калеснікаў некалькі разоў спрабаваў дамагчыся спаткання з дачкой, але яму не дазволілі.
Паводле слоў мужчыны, падчас ягонай апошняй спробы наведаць дачку супрацоўнікі гомельскай калоніі заявілі: “Калі яна не тэлефануе ці не піша, значыць, яна гэтага не хоча”. “Я магу толькі маліцца богу, каб яна была яшчэ жывая. Улады ігнаруюць мае просьбы аб сустрэчы і лістах — гэта жудаснае пачуццё бездапаможнасці для бацькі”, — сказаў Калеснікаў.