З пачатку года польскія вайскоўцы зрабілі больш за 1,6 тыс. папераджальных стрэлаў на мяжы з Беларуссю
25 кастрычніка, Позірк. З пачатку года вайскоўцы Польшчы, якія ахоўваюць мяжу з Беларуссю, вырабілі 1.609 сігнальных і папераджальных стрэлаў баявымі патронамі, паведаміла са спасылкай на Міністэрства нацыянальнай абароны выданне Wiadomosci.
У абаронным ведамстве паведамілі, што сёлета не зафіксавана ніводнага выпадку ранення мігрантаў у выніку прымянення зброі.
“Мы выкарыстоўваем непранікальныя гумовыя кулі, і гэта крайняя мера пры стральбе ў чалавека. Але дзякуючы гэтаму пасля некалькіх ужыванняў гладкаствольнай зброі высветлілася, што самыя агрэсіўныя мігранты, калі бачаць, што салдаты ўзброеныя такой зброяй, не робяць ніякіх спробаў агрэсіі. Гэта з’яўляецца эфектыўным стрымліваючым фактарам”, — заявіў камандуючы армейскай аператыўнай групай “Бяспечнае Падляшша” генерал Аркадыюш Шкутнік.
Пётр Скіба, прэс-сакратар раённай пракуратуры Варшавы, паведаміў, што мясцовае ваеннае ўпраўленне цяпер расследуе дзве справы, звязаныя з ужываннем зброі салдатамі, якія нясуць службу на мяжы.
Першая справа тычыцца сітуацыі 3 лістапада 2023 года, калі падчас пагоні быў паранены грамадзянін Сірыі. Яго даставілі ў бальніцу.
Другая — інцыдэнт 25 сакавіка гэтага года, калі двое вайскоўцаў адкрылі агонь каля Дубіча-Цэркэўнэ ў момант, як некалькі дзясяткаў замежнікаў атакавалі мяжу. У Нацыянальнай пракуратуры паведамілі, што было зроблена некалькі стрэлаў у мігрантаў, хоць вайскоўцы “не знаходзіліся ў небяспечнай для жыцця сітуацыі”.
21 кастрычніка Gazeta Wyborcza са спасылкай на намесніка міністра нацыянальнай абароны Польшчы Паўла Бейду паведамляла, што з пачатку года на мяжы з Беларуссю раненні атрымалі 63 польскія вайскоўцы.
Паводле слоў Бейды, у рамках распачатай 1 жніўня аперацыі “Бяспечнае Падляшша” на дапамогу памежнікам, якія нясуць службу на мяжы з Беларуссю, накіравана 5 тыс. польскіх вайскоўцаў, яшчэ 800 знаходзяцца ў рэзерве.
Пры гэтым у выпадку пагаршэння сітуацыі з бяспекай армія “можа адправіць у бой да 17 тыс. чалавек, 9 тыс. могуць быць адпраўленыя на мяжу з усім сваім рыштункам і зброяй на працягу 48 гадзін”, адзначыў тады намеснік кіраўніка абароннага ведамства Польшчы.
Згодна з праведзеным “Позіркам” аналізам аператыўных звестак польскай памежнай службы, паводле стану на 22 кастрычніка Польшча спыніла 27.996 спробаў нелегальнага пранікнення на сваю тэрыторыю праз беларускую мяжу, у параўнанні з аналагічным перыядам мінулага года назіраецца рост на 22,5% (з 22.858).
За 1–22 кастрычніка гэтага года Польшчай спыненыя 1.134 згаданыя спробы — на 22,6% менш, чым за аналагічны перыяд мінулага года (1.465).
6 чэрвеня стала вядома пра смерць вайскоўца 1-й танкавай брыгады Матэвуша Сітэка, параненага 28 траўня на мяжы з Беларуссю. Паводле інфармацыі Памежнай аховы Польшчы, Сітэк падвергнуўся нападу мігранта, які ў складзе вялікай групы спрабаваў незаконна перасекчы мяжу з боку Беларусі.
Міграцыйны крызіс на мяжы Беларусі і краін ЕС працягваецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.