У кастрычніку тэхагляд прайшло амаль на 12% транспарту больш, чым годам раней

5 лістапада, Позірк. У кастрычніку 2024 года прадпрыемства “Белтэхагляд” выдала 132.320 дазволаў на допуск транспартнага сродку да ўдзелу ў дарожным руху — на 11,5% больш, чым за кастрычнік 2023-га (118.631).

Фізічным асобам у мінулым месяцы выдадзена 104.984 дазволы — 79,3% агульнай колькасці.

За дзесяць месяцаў выдадзена 1.281.777 дазволаў — на 3,2% менш, чым за студзень — кастрычнік 2023-га (1.324.252), адзначае прадпрыемства.

У кастрычніку аформлена 1.006 дазволаў на электрамабілі, з пачатку года — 12.034 (леташняя мінулага года не прыводзіцца).

Паводле звестак Нацыянальнага статыстычнага камітэта, паслугі тэхагляду легкавых аўтамабіляў у студзені — верасні 2024 года падаражэлі на 6,43%.

Кантроль наяўнасці дазволу на допуск ажыццяўляецца ў тым ліку ў аўтаматычным рэжыме адмысловымі тэхнічнымі сродкамі, якія маюць функцыі фота- і кіназдымкі, відэазапісу.

Згодна з ч. 4 арт. 18.11 КаАП, для ўласнікаў — фізічных асоб штраф за кіраванне транспартам без тэхагляду можа дасягаць 3 базавых велічынь (120 рублёў), юрыдычных асоб і індывідуальных прадпрымальнікаў — 10 б. в. (400 рублёў).