Банкі, якія працуюць у Беларусі, паведамілі пра новаўвядзенні для кліентаў

6 лістапада, Позірк. Шэраг банкаў, якія працуюць у Беларусі, змяніў асобныя правілы абслугоўвання і прадставіў новыя магчымасці для кліентаў, сведчыць праведзены “Позіркам” маніторынг іх паведамленняў.

Банк “ВТБ (Беларусь)” запусціў крэдытаванне малога бізнесу без закладу на суму да 1 млн рублёў. Аформіць заяўку можна онлайн або праз персанальнага менеджара. Крэдыт даступны юрыдычным асобам і індывідуальным прадпрымальнікам на тэрмін ад 1 года са стаўкай ад 12,5% гадавых. Фінансаванне можа прадастаўляцца ў форме крэдытнай лініі або авердрафту.

“Банк РРБ” павялічыў час працы сваіх аддзяленняў. Цяпер фізічныя асобы могуць аформіць крэдыт, размясціць грошы ва ўклад, ажыццявіць перавод і іншыя аперацыі ў цэнтрах банкаўскіх паслуг у буднія дні да 19:00. Акрамя таго, аддзяленні банка будуць абслугоўваць кліентаў па суботах.

“Беларусбанк” абвясціў аб новай паслузе па абмене валют. Больш выгадныя ўмовы па спецыяльным курсе даступныя пры аперацыі, сума якой роўная або перавышае 10 тыс. долараў або еўра, 1 млн расійскіх рублёў, 100 тыс. кітайскіх юаняў (у адпаведнасці з валютай абмену). Выбар аддзялення банка і ўмовы здзяйснення валютна-абменнай аперацыі ўзгадняюцца з кліентам індывідуальна.

“Белгазпрамбанк” устанавіў абмежаванні па аперацыях зняцця наяўных грошай з выкарыстаннем банкаўскай карткі “Разліковая картка нерэзідэнта” — максімум 10 тыс. долараў на працягу 30 дзён. Максімальная сума выдачы наяўных у банкаматах з картак, эмітаваных банкамі-нерэзідэнтамі, — 5 тыс. долараў (альбо эквівалент у іншай валюце) на працягу 30 сутак.

“Белінвестбанк” у рамках сумеснай партнёрскай праграмы з “Белдзяржстрахам” дазваляе застрахаваць рызыкі, звязаныя з выкарыстаннем не толькі банкаўскіх картак, але і рахункаў, і электронных кашалькоў. Пры страхаванні банкаўскіх картак або электронных кашалькоў базавы страхавы тарыф складзе 0,25% ад страхавой сумы, а пры страхаванні рахунку кліента — 0,7%. Дадзены выгляд страхавання прадугледжвае растэрміноўку.

“БНБ-Банк” прыпыніў выпуск і перавыпуск картак “Белкарт” у расійскіх рублях, а таксама падоўжыў да 30 красавіка 2025 года для ІП і натарыусаў акцыю для кліентаў, падлучаных да пакета Solo да 1 траўня 2023 года, пры пераходзе на пакет “Імклівы рост” (камісія за перавод з адкрытага рахунку на рахунак з карткай фізасобы складзе 0,75%).

“Тэхнабанк” будзе спаганяць камісію за абслугоўванне юрыдычных асоб і ІП пры пераводах сродкаў за межы банка на падставе плацежнага даручэння кліента, плацежнага патрабавання: у расійскіх рублях — 0,1% ад сумы (мінімум 10, максімум — 50 долараў), з канверсіяй ў індыйскія рупіі на карысць бенефіцыяраў, якія абслугоўваюцца ў банках Індыі, — 75 долараў, на карысць бенефіцыяраў, якія абслугоўваюцца ў банках-нерэзідэнтах у Кітаі, — 3,2% ад сумы (мінімум 170 долараў).

“Цэптэр Банк” абвясціў аб даступнасці для юрыдычных асоб і ІП міжнародных пераводаў у дырхамах ААЭ. Мінімальная сума такога пераводу — 320 еўра ў эквіваленце (камісія складзе 0,8%, плюс дадаткова камісіі трэціх банкаў, у тым ліку за правядзенне плацяжу, запыт камплаенса).

На 1 лістапада 2024 года ў краіне зарэгістравана 22 банкі (адзін з іх — “Дэльта Банк” — знаходзіцца ў стадыі банкруцтва).

Прыбытак банкаў на 1 кастрычніка 2024 года склаў 2 млрд 842,3 млн рублёў — на 32% больш, чым на аналагічную дату 2023-га (2 млрд 152,6 млн), сведчыць праведзены “Позіркам” аналіз звестак Нацыянальнага банка.

Нарматыўны капітал павялічыўся на 14,3% (з 19 млрд 196,8 млн да 21 млрд 944,4 млн), актывы, дастатковасць нарматыўнага капіталу — на 1,4 п.п. (з 19,3% да 20,7%), актывы, схільныя да крэдытнай рызыкі, — на 14,4% (з 91 млрд 910,8 млн да 105 млрд 170,8 млн).