ЦВК акрэдытаваў амаль 600 назіральнікаў на выбары прэзідэнта

14 лістапада, Позірк. Тэрытарыяльнымі камісіямі па выбарах прэзідэнта акрэдытавана 593 нацыянальныя назіральнікі, паведамляе Цэнтрвыбаркам.

Большасць назіральнікаў прадстаўляюць грамадскія аб’яднанні — 423 чалавекі (71,3% ад агульнай колькасці). Партыі накіравалі 110 чалавек (18,5%), грамадзяне — 43 (7,3%), працоўныя калектывы — 17 (2,9%).

Пры ЦВК акрэдытавана шэсць назіральнікаў.

Акрэдытацыя нацыянальных назіральнікаў завершыцца 20 студзеня 2025 года.

Сёмыя выбары прэзідэнта прызначаныя на 26 студзеня 2025 года. У дзень, калі Палата прадстаўнікоў прыняла адпаведнае рашэнне, 23 кастрычніка, Аляксандр Лукашэнка паведаміў, што прыме ў іх удзел.

Дэмсілы ў сумеснай заяве, прымеркаванай да прызначэння даты прэзідэнцкіх выбараў, заклікалі галасаваць “супраць усіх”. На іх думку, галасаванне “супраць усіх” пакажа, што “беларускае грамадства па-ранейшаму супраць Лукашэнкі і патрабуе свабодных і сумленных выбараў”.

Беларускія ўлады пасля 2020 года не запрашаюць назіральнікаў ад АБСЕ і іншых міжнародных структур, якія крытыкуюць непразрыстасць і недэмакратычнасць выбарчага працэсу. Ва ўжытак уведзены выраз “электаральны суверэнітэт”.