Латушка заклікаў міжнародную супольнасць асудзіць масавыя затрыманні ў Беларусі
15 лістапада, Позірк. Асудзіць “несправядлівыя масавыя затрыманні, якія адбываюцца па ўсёй Беларусі на працягу апошніх двух тыдняў”, заклікаў намеснік старшыні Аб’яднанага пераходнага кабінета (АПК), кіраўнік Народнага антыкрызіснага ўпраўлення (НАУ) Павел Латушка.
Палітык у сацсетцы Х звярнуўся да МЗС Польшчы, Літвы, Латвіі, Эстоніі, Чэхіі, Швецыі, Германіі, а таксама да кіраўніка Еўракамісіі Уршулі фон дэр Ляен, вярхоўнага прадстаўніка ЕС па замежных справах і палітыцы бяспекі Жазэпа Барэля і Еўрапейскай службы знешніх дзеянняў.
Кіраўнік НАУ адзначыў, што “ў кожным рэгіёне Беларусі актывісты, сваякі палітвязняў, валанцёры і людзі, якія выехалі за мяжу з 2020 года, падвяргаюцца асабліва жорсткім рэпрэсіям”.
“Дыктатар павінен зразумець, што яго “падрыхтоўка” да перапрызначэння (маюцца на ўвазе выбары 26 студзеня. — “Позірк”.) не застанецца незаўважанай, што палітычна матываваныя пераследы не застануцца беспакаранымі, а беларускі народ павінен ведаць, што ён не застанецца сам на адзін з рэпрэсіўнай машынай Лукашэнкі”, — напісаў Латушка.
Прадстаўніца па сацыяльнай палітыцы АПК Вольга Зазулінская, каментуючы масавыя затрыманні, заклікала беларусаў паклапоціцца аб сваёй бяспецы, праверыць, каб дома не захоўвалася нічога, што можа прыцягнуць увагу сілавікоў і выконваць інструкцыі лічбавай бяспекі. У выпадку небяспекі Зазулінская заклікала звяртацца ў фонд салідарнасці BySol.
14 кастрычніка праваабарончыя арганізацыі паведамілі пра хвалю затрыманняў па ўсёй Беларусі: вядома пра такія факты ў Гродне, Жодзіне, Мінску, Брэсце, Кобрыне, Баранавічах, Віцебскай вобласці. Сярод затрыманых ёсць і сваякі палітвязняў, у аблавах бралі ўдзел супрацоўнікі КДБ. Прычыны затрыманняў невядомы.
Затрыманні таксама адбываліся на працягу мінулага тыдня.
Праваабарончы цэнтр “Вясна” паведаміў 14 лістапада аб тым, што з пачатку восені ў Беларусі зафіксаваны 1.452 факты палітычных рэпрэсій (затрыманні, ператрусы, адміністрацыйныя суды і інш.).
З верасня па сярэдзіну лістапада ў судах разгледжана не менш за 1.213 адміністрацыйных спраў паводле арт. 19.11 (распаўсюджванне, выраб, захоўванне, перавозка інфармацыйнай прадукцыі, якая змяшчае заклікі да экстрэмісцкай дзейнасці або якая прапагандуе такую дзейнасць) і арт. 24.23 (парушэнне парадку арганізацыі і правядзення масавых мерапрыемстваў) КаАП. 488 прыйшліся на верасень, 537 — кастрычнік, 188 — на першую палову лістапада.
Пры гэтым на працягу трох летніх месяцаў было разгледжана толькі 975 спраў паводле гэтых артыкулаў.
15 лістапада кіраўнік фонду салідарнасці BySol Андрэй Стрыжак паведаміў аб мабілізацыі ўсёй службы эвакуацыі з Беларусі ў сувязі з новым рэйдам сілавікоў.
“Заявак шмат. Выводзім людзей з-пад удару”, — напісаў Стрыжак у сацсетках.