Лукашэнка запрасіў у Беларусь прэзідэнта Таджыкістана Рахмона

16 лістапада, Позірк. “Вы ведаеце, што дзверы гасціннай Беларусі заўсёды адчыненыя і я з вялікім задавальненнем буду чакаць новай сустрэчы”, — адзначыў Аляксандр Лукашэнка, віншуючы 16 лістапада Эмамалі Рахмона з 30-годдзем уступлення на пасаду прэзідэнта Таджыкістана.

Прыход таджыкістанскага палітыка ва ўладзе “на пачатку супярэчлівых 90-х гадоў”, на думку віншавальніка, стаў “па-сапраўднаму лёсавызначальным для краіны”. “Разам з вашай знакамітай фразай “Я прынясу вам мір!” на таджыкскую зямлю вярнуліся стабільнасць, нацыянальнае адзінства і ўпэўненасць у заўтрашнім дні. Вы з гонарам выканалі дадзенае свайму народу абяцанне”, — гаворыцца ў віншаванні, апублікаваным прэс-службай Лукашэнкі.

Адзначыўшы, што вельмі шануе сяброўства з Рахмонам і “магчымасць у любы момант знайсці вырашэнне нават самых складаных пытанняў”, ён заявіў, што “шчыра паважае” стойкасць і мужнасць прэзідэнта Таджыкістана, “якія з’яўляюцца залогам паступальнага развіцця і ўмацавання братэрскіх стасункаў паміж Мінскам і Душанбэ”.

Рахмон наведваў Беларусь год таму, ён удзельнічаў у сесіі Савета калектыўнай бяспекі АДКБ, якая адбылася 23 лістапада 2023 года ў Мінску.

Віншуючы таджыкістанскага палітыка з 71-годдзем сёлета 5 кастрычніка, Лукашэнка “пацвердзіў гатоўнасць” Беларусі да “шчыльнай сумеснай працы па далейшым пашырэнні шматпланавага і доўгатэрміновага стратэгічнага партнёрства дзвюх краін, аснову якога складае гістарычная блізкасць іх народаў”.

Эмамалі Рахмон, як і Аляксандр Лукашэнка, заняў прэзідэнцкае крэсла ў 1994 годзе (да гэтага два гады ўзначальваў Вярхоўны савет) і пасля ўсталяваў у краіне аўтарытарны рэжым. Таджыкістанскага палітыка абвяшчалі кіраўніком дзяржавы яшчэ чатыры разы — у 1999, 2006, 2013 і 2020 гадах — па выніках выбараў, якія суправаджаліся заявамі пра фальсіфікацыі, адсутнасць канкурэнтных умоў ды інш.

На сустрэчы з амбасадарам Таджыкістана Бахтаварам Сафарзадой 15 студзеня 2024 года ў Мінску Лукашэнка заявіў, што ў гандлёва-эканамічных стасунках Мінска і Душанбэ “праблем процьма”, а задач, “якія трэба вырашаць”, — “такая ж колькасць”.

Ён спаслаўся на даныя МЗС, які канстатаваў “нязначнае зніжэнне” двухбаковага тавараабароту па выніках 2023 года. Аднак, адзначыў Лукашэнка, 2022 год забяспечыў “прыстойнае зніжэнне” ўзроўню ўзаемнага гандлю.

Паводле сцвярджэння Лукашэнкі, у Беларусі “маецца усё неабходнае, у чым мае патрэбу Таджыкістан у галіне прамысловасці, сельскай гаспадаркі, <…> аўтамабільнай тэхнікі, асабліва вялікагрузаў”. Ён заявіў пра гатоўнасць “падключыцца да аказання дапамогі ў гарантаванні бяспекі” Таджыкістана.

Паводле даных таджыкістанскіх уладаў, тавараабарот паміж Мінскам і Душанбэ ў 2022 годзе склаў 89,4 млн долараў, доля паставак з Беларусі ў яго структуры — 82,2 млн (92%).

Згодна з рэйтынгам, апублікаваным у траўні 2024 года часопісам Global Finance на падставе ўзроўню ВУП на душу насельніцтва з улікам парытэту пакупніцкай здольнасці, Таджыкістан — самая бедная краіна Цэнтральнай Азіі.