Чэргі на выезд велікагрузаў у ЕС павялічваюцца — Дзяржпагранкамітэт

20 лістапада, Позірк. На 10:00 20 лістапада ў чарзе на выезд з Беларусі ў Еўрапейскі саюз знаходзілася 1.550 грузавікоў — на 39,6% больш, чым на аналагічны час 18 лістапада (1.110), і на 31,4%, чым на 19 лістапада (1.180), вынікае з праведзенага “Позіркам” аналізу даных Дзяржаўнага памежнага камітэта.

Выезду ў Латвію ў пункце пропуску “Грыгараўшчына” чакала 470 велікагрузаў (18 лістапада — 400, 19-га — 450).

У двух пунктах пропуску на літоўскім напрамку ў 10:00 стаяла 800 фур (610 і 695 адпаведна): Каменны Лог — 380 (280 і 340), Беняконі — 420 (330 і 355).

На беларуска-польскай мяжы ў пункце пропуску Казловічы знаходзілася 280 грузавікоў (100 і 35).

Краіны ЕС закрылі частку пунктаў пропуску на мяжы з Беларуссю з-за абвастрэння адносін з Мінскам пасля падзей 2020 года.

Закрыццё сумежных пунктаў пропуску з беларускім бокам звязана сярод іншага з міграцыйным крызісам на мяжы Беларусі і краін ЕС, які працягваецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.

Пасля вынясення палітычна матываванага прысуду журналісту Анджэю Пачобуту (8 гадоў пазбаўлення волі) 10 лютага 2023 года Польшча на нявызначаны тэрмін закрыла адзін з двух даступных для падарожнікаў пунктаў пропуску — Баброўнікі (з беларускага боку Бераставіца). Улады Польшчы прама заяўлялі, што менавіта з вызваленнем палітвязня можа быць звязана адкрыццё пунктаў пропуску.